呢輪優質工業股受基金經理追捧，批股集資活動自然多好多，好似噚日停牌的精電國際（710），市場傳聞大股東減持舊股套現，據講每股8.20元，配售3500萬股，抽水成2.87億銀咁多。
每股配售價8.20元，較停牌前收市價9.05元有成9.39％折讓，批貨數量又唔細，加上今次又係大股東減持，公司冇錢落袋，消息睇落唔多正面，但經紀黃話唔擔心精電復牌後有沽壓，皆因成手貨由少數基金經理要晒，唔會搞到周街貨，所以佢覺得股價應該頂得住。
查實精電在呢輪工業股浪潮中，獲得唔少證券行推介，估計即將公布的04年全年業績，盈利增長會好掂，同埋估計會有特別息派。
精電生產的手機彩電顯示屏，受惠於呢幾年手機市場強勁增長，現時內地人人都話要換彩芒手機，精電的生意自然多，好幾間證券行都將精電的目標價，定於10元附近。
慕容小初