煲呔正式登場，由賭王鳴鑼開道，喝退其他滋事分子唔好同煲呔爭參選！
無論係兩年定五年，煲呔都冇得表態，不過賭王就經已揭盅，話係「二加五加五」，即是做十二年！咁嘅噩耗，對於班土共老左，簡直晴天霹靂，諗諗吓，若然現時唔郁手，先發制人，將煲呔扼殺在搖籃之中，港英餘孽治港，分分鐘會變為結構性！
賭王咁講，絕有道理！因為煲呔呢個「細曾」上頭，重有一個超級赤色「大曾」，係煲呔保家！兩年之後，煲呔若然冧檔，咁即是話坐鎮北京嘅「大曾」佢眼光奇差，正如江太祖力撐廢董，煲呔一坐上個位，若然冇大差池（以煲呔性格，重大政治事件如普選及23條，乜都會請示，全港市民都知道係大曾或壽爺揸弗，煲呔又會有乜大差錯？）就一定唔會在○七年落台！
所以反煲呔曾，亦即是反胡溫曾，挺曾即是真愛國呢，何鴻燊今次就表現出最徹底及最堅定嘅高尚愛國情操嘞！
反曾大聯盟一計不成，又生一計，製造輿論，力迫煲呔放棄大英爵士銜，同埋退出教會！
真係好笑！在胡溫曾眼中，曾蔭權榮為英國爵士，連江太祖學講英文一世，鬼咁辛苦，都冇此殊榮，呢一樣即是炎黃子孫的驕傲，代表咗國際人脈關係及視野，值錢就值錢在呢度！連中共都與時俱進，眼光與八年前唔同，若然唔係，接替廢董嘅就係大紫荊得主嘅暴亂首領楊光，而唔係曾蔭權爵士（KBE）囉！
至於天主教徒身份，歸屬梵蒂岡，更係「與國際接軌」嘅象徵！起碼兼任天主教徒嘅曾爵士，若然有人話佢係共黨地下黨員，打死都冇人信，對於提升香港嘅文明形象，吸引國際資金，大有幫助！更何況他日中共與梵蒂岡建交，分分鐘會由曾爵士做埋密使㖭！
面對土共眼紅症嘅民粹噪舌，當奴顯示強勢行政主導，爵士照做，教堂照上，天主照拜，一於睬佢都儍，一洗廢董時代面對老左四圍打恭作揖嘅奴才作風，係一個好嘅開始！
應從得你一次，唔做爵士，又唔准上教堂，下次咪連煲呔都唔准打，要改穿農民裝？唔得！
曾爵士治港，都係賭王買得準，佢睇十二年！土共重有乜好爭，都係眼白白睇住港英餘孽全無對手，一人當選喇！
傳真︰2623-9278
電郵︰[email protected]