由美國電視頻道TVLand主辦嘅「第三屆TVLand頒獎禮」前日喺加州舉行，呢個頒獎禮係以公眾投票方法，選出大眾心目中嘅經典電視節目同演員，除咗一系列老牌電視劇有獎攞外，喺美國播咗一年左右嘅人氣劇集《靚太唔易做》亦獲頒「未來經典大獎」。
《靚》劇嘅兩位主角泰莉夏卓爾（TeriHatcher）同伊娃隆歌莉亞（EvaLongoria），前日一身性感打扮去到領取「未來經典大獎」，佢哋都話對攞獎感到意外，但亦證明觀眾非常有品味喎。
而成人雜誌《花花公子》有見《靚》劇過去半年喺美國大紅，最近出價九百五十萬美金（約七千五百萬港元），邀請佢哋五位主角拍裸照，不過泰莉得知消息後，即時禁止另外四位女主角接受邀請，佢話咁樣只會整cheap自己，泰莉話：「我覺得咁做非常唔妥，啲人只想睇我哋唔着衫。」
此外，樂壇盛事「SoulTrain音樂頒獎禮」獲頒「流行文化獎」，兩屆金像影后莎莉菲（SallyField）亦憑劇集《TheFlyingNun》嘅角色贏得「觀眾選擇大獎」以及「電影電視明星獎」，而婦女節目《CarolBurnettShow》就得到「傳奇大獎」。
圖片：路透社
