新春過後樓市勁旺，戴德梁行董事陶汝鴻話，農曆年前公司每日做兩千宗口頭估價查詢，近日就達三千宗，多咗一半。
戴德梁行執董黃錫興話，佢哋做嘅估價，最後通常有十個巴仙成交。
個市咁旺，戴德梁行就算有近八十個估價師，都做到冇停手，睇嚟要問老闆加人至得。
陶汝鴻話，公司參考歐洲模式，加以改良而成嘅亞太區七個主要城市物業趨勢報告，五月推出，不過要畀錢至有得睇。佢話，報告會分析寫字樓、住宅同商舖，未來五年走勢，同有乜影響因素等，報告每半年會update一次。報告對象係發展商、機構投資者同投資銀行。
七個城市為北京、上海、香港、台北、吉隆坡、新加坡同曼谷，係歐美國家最感興趣投資嘅亞太城市。
戴德梁行集團主席梁振英話，歐洲國家如德國，啲人儲蓄率高，但當地樓市唔好，資金惟有流向海外，好似舊年促成嘅鰂魚涌電訊盈科中心二十八億成交，買家就係德國資金。
另外，梁振英話，港英時代都有換港督例子，特區出現換特首唔係咁出奇。
資深投資者Lobo羅（羅家寶），上次瞓身競投九龍灣地王唔成功，即刻拚命喺私人市場吸納投資物業，以行動證明真係極睇好個市，據卓德講，佢噚日用六千八百萬，買入尖沙嘴寶勒巷十號地盤，樓面地價約二千七百蚊呎，可以起賓館或寫字樓。
據報，Lobo早前以大約兩億銀，向接管人安永會計師行，大手買入均來發展嘅小欖愛琴灣六十一伙住宅，同埋一百一十六個車位。
另一投資者大鴻輝，剛以六千八百八十萬，賣出旺角砵蘭街二九二至二九四號，地舖一千呎，閣樓八百呎，比○一年買入價五千一百萬，賺一千七百八十萬，個舖由友暉雲石以每月三十六萬租用，回報六厘三。
炒家肆虐，連居屋都唔放過，上月二手居屋摸貨登記有九宗，雖然唔夠一月嘅十宗咁多，但比例達一點七五巴仙，係九七後單月新高。
有六個居屋屋苑錄得逾十宗登記，最多係馬鞍山富安花園嘅十五宗，其次係火炭穗禾苑，有十三宗；而九龍灣麗晶花園則以十二宗，與藍田康華苑同列季軍。
中記黃良昇話，數據反映居屋價錢已經累積一定升幅，部份炒家出貨獲利；但因二手居屋價格升幅仍然跟唔上大市，相信會吸引另一批炒家入市追落後。
以前嘅調景嶺，俾人感覺係地方偏遠，不過，自從地鐵通車之後，方便程度同市區已經冇乜分別。好似長江實業同南豐集團嘅調景嶺站上蓋項目，今日將會公布樓盤命名，準備展開連串開賣部署。
長實高級經理郭子威話，呢個樓盤基座有通道直駁地鐵站，住戶上下班，去搭地鐵，只須一分鐘，認真方便。即使打風落雨，由於有蓋遮擋，連雨具都唔使帶。
配合樓盤嘅推廣，調景嶺地鐵站裏面，噚日已經見到長實工作人員，趕工搭建展覽場地。
電郵地址：[email protected]
