唔知波迷有無發覺，最近各主要聯賽強隊W賠率都被下調，愈捧愈熱，但就狂贏少輸。特別想提提最近長贏嘅意甲雙雄AC米蘭、祖雲達斯；踢長命賽好似孖公仔咁並列榜首，拋離第三位嗰兩隊十六分，形成單打獨鬥。我求大俠就覺得佢哋帶離咁遠，除咗實力超班外，運氣同其他各方有利因素都幫晒佢哋。
好似前晚祖記作客基爾禾場波，明明主隊柏利斯亞射個波彈中楣底落地後入咗白界，竟然都判唔入，OK，重可以賴旁證；到薛比拿後來撞低柏利斯亞無判十二碼，球證責無旁貸。查實近期好多人談論球證偏幫祖記（上場對羅馬得到問題十二碼）同成日喺長時間補時入波嘅AC米蘭；無證據，我求大俠唔敢評論係咪偏幫，至少話雙雄夠運就一定無錯。點都好，呢期意甲雙雄咁紅咁惡，想敲佢哋對家都係諗過先好。
巴迪高掛靴不離球圈
「巴迪高」退役！陪住唔少波迷成長嘅巴迪斯圖達噚日宣布掛靴。不過佢嘅擁躉亦唔使太失望，反正「巴迪高」話會響唔同崗位繼續足球事業，重想做教練㖭，話唔定好快又喺綠茵場見番佢。咦，佢母會費倫天拿近年不斷換教練，唔知將來會唔會輪到「巴迪高」呢？
朗尼嫂飛上枝頭
當講起曼聯前鋒朗尼嘅女朋友高蓮，球迷通常都會諗到佢係肥妹仔一名，冇乜特別。不過，最近有消息傳出高蓮將會替時裝雜誌《Vogue》嘅六月號影相，刊登喺中間跨頁，重話有可能成為封面 㖭！究竟係高蓮女大十八變，定抑或喺男友朗尼嘅金錢堆砌下，成功變身成鳳凰呢？
碧咸布置小型博物館
新嘅英國溫布萊球場雖然要喺○六年先至開幕，但唔少名人已買咗或租咗佢哋嘅包廂，英格蘭隊長碧咸就租用咗要二十萬鎊（約三百萬港元）一年嘅二十座位包廂十年，重着手設計包廂裏面嘅裝飾。據講佢會將自己職業生涯嘅剪報同紀念品擺喺包廂度，成為小型碧咸博物館。
沙維亞輸波無輸鬥心
久違嘅沙維亞上周日終於為羅馬正選上陣，估唔到佢依然保持住個「金毛獅王」頭，足見呢個球員好有「堅持」。雖然場波羅馬最後○比三輸咗，同埋失第二球沙維亞有啲責任，但係對於十個月冇正式踢過比賽嘅佢來講，表現已經好唔錯，我求大俠希望佢繼續畀心機喇！