民主派有人想搵民主女神余若薇參選特首，一於同煲呔曾鬥過，但有報道指，余若薇嘅老公係最大阻力，除非余若薇為選特首先辭去立法會議員一職，咁就有得諗。
不過咁講有啲問題，因為司、局長等法律訂明嘅公職人員參選，要按規定喺報名前辭職，但立法會議員就唔同，參選時唔使辭職，當選後先要辭去議員職務。余若薇丈夫冇理由想太太唔做議員，走去做更難啃嘅特首。
余若薇噚晚同關注組嘅戰友一齊主持網上電台節目時，湯家驊話，睇到報紙標題大大隻字寫「余若薇丈夫」點樣點樣，真係嚇親。余若薇亦大笑，佢話自己一定做唔到特首，阻力並非來自老公。佢自爆話，自己每個星期平均要食八粒頭痛藥，比起董建華食兩粒止痛藥已經頂唔順要提早唔撈，余若薇咪嚴重得多？不過八方見余若薇好勤力出席立法會會議之餘，重可以日日扮到靚一靚，真係睇唔出佢成日頭痛喎。
傳真︰2623-9278
電郵︰[email protected]