花甲史釗活陪小Penny晒婚戒

聽日就係英國老牌男歌手洛史釗活（RodStewart）名模女友PennyLancaster嘅三十四歲生日，相信佢今年嘅生日，應該過得特別難忘，因為同佢一齊五年嘅男友洛史釗活，早幾日送咗一份好特別嘅生日禮物畀佢，六十歲嘅史釗活喺巴黎向Penny求婚，重送咗隻名貴鑽戒畀佢，相信Penny一定好開心。

年齡相差26
雖然史釗活同前妻RachelHunter已經分開咗好耐，但係Rachel一直唔肯離婚，據聞早排史釗活已經同Rachel傾掂數，開始搞離婚，所以上星期三佢終於趁同女友去法國度假期間，喺巴黎鐵塔成功求婚，佢哋重預計今年稍後時間喺教堂行禮。
其實佢兩個初初拍拖好多人都唔睇好，事關Penny重細Rachel一年，同史釗活年齡相差二十六年，大家都覺得佢會好似Rachel一樣，最終同史釗活分手，不過見佢哋呢幾年互相扶持，相信婚後依然咁恩愛，前日佢哋宣布結婚後出嚟會見傳媒，着白色短裙嘅Penny一直攬住史釗活，又好風騷咁晒佢隻超級鑽戒，完全係一副幸福小女人嘅樣。
不過史釗活年紀都有番咁上下，佢嘅五個仔女係同三個唔同嘅女人所生，如果Penny想名正言順做佢第四個女人嘅話，睇怕都要快啲做吓嘢喇。