尋覓真命天子
第一集《BJ》出場，已經令不少女士讚不絕口。《芝加哥》雲妮絲穎嘉（Renee Zellweger）扮演BJ，佢為BJ由瘦變肥，到拍完後立即變瘦都無話辛苦，重要學習英倫口音，但依然想接第三集。《摘星奇緣》曉格蘭特（HughGrant）就扮回現實中的自己，花心漢。《真的戀愛了》哥連卓夫（ColinFirth）穩重高昂的個性，喺其他片中都扮演同類型的角色，真正嘅佢其實係唔係咁呢？
今集《BJ》講碧姬鍾斯（雲妮）正式與律師馬克（哥連）拍拖，一向鍾意亂諗嘢嘅佢，唔相信自己會搵到個好男人，最重要唔介意佢肥。不過好景不常，突然馬克身邊出現個美女，妒火終燒下，搞到同馬克的感情陷入危機。此時，舊上司丹尼（曉）又再同佢共事，究竟佢最後會同邊個一齊？
DVD內收錄了刪剪片段，導演碧芭潔倫（BeebanKidron）重會講解刪剪原因。另外，此碟最特別嘅係有一個心理測驗遊戲，睇吓妳嘅理想對象係邊類，暫時我都未見過街外有DVD除睇戲外，重有遊戲玩。
發行：年代影視（27873612）
三級刪剪片段
對於一套神與魔鬼鬥爭的電影，《驅魔人》都算係好成功，《星戰》都有前傳，無理由《驅魔人》唔交代吓啩！《DieHard2》導演蘭尼夏連（RennyHarlin）處理驅魔人的角色，想將佢表現得與普通人無異，驅魔人也會離棄神及對神失望的時候。史達倫史卡斯（StellanSkarsgar）演墨林神父，一個未真正驅過魔的人，要扮演如此出神入化，除了他這類實力派演員外，真係好難搵到第二個。以一套荷李活式恐怖片嚟講，《前傳》可能畀唔到好大嘅驚嚇場面，因導演着重氣氛，令觀眾能全情投入，感受其個中的恐怖，唔似得一般恐怖片咁，失驚無神嚇你一跳。如果喜歡血腥暴力的你，可能會有少少失望。
故事講述墨林神父（史達倫）放棄當神父，轉而跟考古隊伍進行探索工作，當他們發掘出一座拜占庭教堂，這座建築物完全沒受歲月洗禮埋於地下，原來教堂之下，有一些恐怖的東西正從沉睡中甦醒，墨林終於要與魔鬼正面交鋒。
此片加入咗未經刪剪三級片段，令全片氣氛更加引人入勝，當發現近排無咩特別嘅恐怖片吸引你去買，《驅魔人前傳》都可算係上佳嘅選擇，此片能正式解釋驅魔人的誕生。
發行：華納影視（31281791