前晚意甲聯拉素主場對國際米蘭，座上客竟然見到車路士班主阿巴莫域治、總監簡安及領隊摩連奴三大要員。你話呢次御駕親征到意大利，係咩目的呢？
為歐冠盃對手吼路？無錯國米將喺周二鬥波圖爭入八強，但佢哋連入唔入到八強都未知，照計摩連奴都唔係咁快淨係為國米打法做定筆記啩！
我求大俠就覺得佢哋應該係嚟SHOPPING就真，梗係唔係話佢哋買衫啦，而係打緊國米球員主意，為來季組軍做嘢！眾所周知「車仔」對國米前鋒阿祖安奴好有興趣，而國米陣中亦有來季「車仔」有權收番嚟用嘅阿根廷國腳華朗，今次重唔係嚟睇辦？
費爵爺響上周六笑到收唔到口，原來曼聯四比○大勝修咸頓入咗足總盃四強。曼聯今季唯一嘅攞盃希望得番足總盃，唔怪得費爵爺四萬咁口喇！之不過佢會唔會開心得太早呢？足總盃四強今晚九時半抽籤，到時抽到同樣「餓」緊盃嘅阿仙奴，睇吓佢重笑唔笑得出。
曼聯傑斯仔一向予人「乖乖仔」嘅形象，但係最近傳媒就踢爆佢同一名女子有染，俾佢嘅同居女朋友知道後即趕傑斯返歸同阿媽住。傑斯同女朋友係同居關係，重有個兩歲大嘅女；傑斯先前好唔容易說服女朋友同佢結婚，重話一心一意，點知搞單咁嘅嘢，睇來婚期無望喇！
車仔「幽會」A高爾經紀人一事，搞咗成個月。正所謂「留得住個人、留唔住個心」，有傳阿仙奴上周日決定喺夏天以二千五百萬鎊賣走佢。阿仙奴領隊雲格擺明唔想A高爾走，重開出期票話佢留隊，喺將來畀佢做埋隊長㖭！
吓，乜未來隊長大熱唔係亨利咩…。
我求大俠上周提過，柏林哈化球員尼安度夫不忿球證幾次誤判，撕爛件衫洩憤；尼安度夫順勢將件爛波衫擺上網拍賣，竟然投到過千歐元！其實尼安度夫講明會將拍賣所得捐去球會慈善基金，用嚟援助南亞海嘯災民。如果唔係做善事，都未必有咁多人爭住要件爛波衫啩！
逢周一至周五見報