韓劇「大長今」掀起嘅韓風，席捲全港，帶挈韓國食肆生意滔滔，趁勢擴充。由投資者尹栢權拆售嘅銅鑼灣糖街小南國狀元樓現址，即銅鑼廣場，四樓全層就畀韓國食肆以二千五百萬出價，擊敗一眾對手，買入自用。
代理中原潘志明話，共有四名買家，獲邀出價競逐，包括新派露天西餐廳、長線投資者同資深投資者黎汝遠，但最終都不敵韓國食肆。呢股韓風，果然銳不可當。全層面積約三千八百呎，呎價六千五百七十九。
潘志明認為，韓國食肆斥資買舖經營，可能係有見於街舖租金隨時加五成至一倍，不如買舖化算，重唔使怕俾業主迫遷。
藝員羅嘉良，舊年初斥資過千萬，買入大嶼山愉景灣大屋，之後就將西貢曉嵐閣舊居放售，到𠵱家差唔多一年，終於賣出，蝕咗百零萬。
聽講，羅嘉良過去一年主攻內地市場，拍咗多部內地劇集，賺埋唔少人仔，於是細屋搬大屋。不過，舊居喺九八年高價買入，加上屬於較冷門嘅物業，就算𠵱家二手咁旺，樓價都去唔番當年水平。單位係二座中層，近一千四呎，成交價六百五十五萬，每呎四千七，比買入價七百九十萬，跌咗十七個巴仙，蝕一百三十五萬。
工廈地廠呢類較冷門物業，受惠於樓市熾熱氣氛，都交投頻密。美記李麗嫦話，長沙灣柏裕工業中心，一個四千二百二十呎地廠，剛獲投資者斥約千八萬買入，呎價四千二百六十五。
單位由食肆承租，租期至二○一○年，每月十萬，計落回報有六厘七，都算合理。
同時荃灣榮興工業大廈地下，約四千七百呎交吉單位，以約七百萬易手，呎價一千四百八十九。
李麗嫦話，房委會計劃拆卸旗下地鐵沿線嘅工廈，令呢類物業價值可看高一線，咁買賣梗係會繼續增加啦！
中記黃良昇話，今個月頭十日，有二千八百宗二手住宅買賣登記，總值八十億五千萬。
黃良昇估計，全月七千六百宗，較二月增四成。總值二百一十六億，增五成，重係七年幾嘅單月新高。
點解總值會升得咁勁？佢話，因為價值二百萬至五百萬嘅中價住宅成交急增。二手樓按新春後增加優惠，例如提供99.9%樓按，吸引上車客，加上同期冇新盤賣，中價二手樓就成市場焦點。
主要反映二月樓市成交嘅三月買賣登記，都已經升咁多，預期四月嘅二手私人住宅登記，好有機會打破舊年十一月嘅紀錄。
一片反價封盤聲中，竟有低價成交，重係比市價低一成！青衣盈翠半島五座高層A，九百六十幾呎，以四百八十萬賣出，每呎五千，比市價低一成。代理話，業主肯平賣，原來係因樓價急升，搞到迷失方向。
另外，北角半山富麗園C座高層二室，九百六十四呎，以低市價八巴仙嘅五百零五萬，連車位沽出。原業主重要蝕二百四十萬，先至可以甩身。
蘭西奇怪，𠵱家啲市場資訊透明度咁高，傳播速度又快，業主要攞最新訊息，一啲都唔困難，絕對冇理由搞到要平咁多賣樓。奉勸同區業主，要多留心，千祈唔好俾呢啲低價成交迷惑，連自己都做錯決定。
電郵地址：[email protected]
