星級名車︰元華濕地試WRXSTi重新體驗四驅辣跑

ImprezaWRXSTi一副戰鬥格，招搖張揚，辛辣外表令人望而生畏；憑《功夫》一片達到事業頂峯的元華師傅，低調寡言，沒有大明星的架子，亦沒半點意氣風發，感覺平易近人；表面上兩者絕不相襯，但當知道華哥曾經係EvolutionVII嘅車主，重要邊揼油邊話：「可惜今日天雨路滑，唔可以試得盡情！」，就知道搵華哥試呢架四驅辣跑，決定好正確。

記者：馬慶武　攝影：陳偉強

加速力與「露笋」不相伯仲

今次相約華哥試車，遇啱整日毛毛細雨嘅天氣，路面濕滑，試車難度好似大增。實則ImprezaWRXSTi擁有恒式四驅系統，喺濕地激劈絕對如魚得水，就連華哥都係咁講：「雖然濕地令我唔敢踩到咁盡，但係都可以感覺到呢架『掃把佬』應付濕地能力好強，令我自揸過Evolution之後重新體會到四輪驅動跑車嘅獨特能力，過彎特別有信心。」講到加速能力，華哥好簡單咁講咗句：「好力，同Evolution相比的話，唔敢話佢勁啲，不過就點都唔會輸蝕。」

■四驅辣跑夠晒全天候，連華哥都讚呢部WRXSTi喺濕滑嘅路面上表現好平穩。

SubaruImprezaWRXSTiSpecification

引擎：1994cc水平對向四汽缸DOCHTurbo
馬力：265ps/6000rpm
扭力：35.0kgm/4000rpm
傳動：6前速手波，恒式四驅
懸掛：（前）麥花臣支柱（後）麥花臣支柱
制動：（前）透氣碟（後）透氣碟（ABS）
輪胎：225/45ZR17
尺碼：4415×1740×1440mm
軸距：2525mm
車重：1450kg
新車售價：$348,000
車輛提供：MotorImage（HK）（25112727）

揸靚車如着名牌

華哥雖然差唔多每次出街都會揸車代步，不過佢就話唔係特別鍾意揸車，對車亦冇特別研究。「無啦啦揸架車去遊車河？唔會！油錢咁貴！」華哥對揸車更有一套獨特見解：「我18歲就考車牌，已經幾廿年牌。後生都會鍾意開快車嗰種刺激快感，𠵱家就冇乜特別感覺，揸咩車對我嚟講就好似着衫一樣，揸靚車咪即係着咗件名牌衫囉，不過我唔係特別鍾意着名牌！」

■華哥話鍾意喺加拿大揸車多啲，因為喺加拿大一條公路閒閒哋來回加埋有8條線，車少路闊，感覺輕鬆啲。

辛辣車身

■頭唇造型殺氣騰騰，如果加裝上霧燈更有RallyFeel。

■排氣喉唔算大口徑，但依然能夠輸出雄渾低沉嘅排氣聲。

■17吋金色胎軨，係STi版標準裝備。

新版獨有
■尾輪拋沙板嘅特別線條係最新05年款獨有特徵。

■車頭網狀鬼面罩上面一個火紅STi字樣，係越野頂級辣跑嘅象徵。

■尾燈中包含有一盞圓形指揮燈，一睇就可以認得出係四驅辣跑WRX。

誇張入風口
■車頭冚上大大個入風口，係ImprezaWRXSTi嘅辣跑標記。

極高尾翼
■造型誇張嘅尾翼，裝飾能力遠遠大於實際用途。

唔會買DreamCar

好多人覺得冇能力擁有嘅車先有資格當DreamCar，華哥就有另類睇法：「我鍾意Jaguar呢個品牌，夠經典。而且都幾襯我呢啲咁成熟嘅男人，哈哈！不過車款我就冇乜研究，咩型號？呀……新款嘅，鬼面罩好似兩撇鬍鬚咁嘅……」相信華哥講緊嘅係積架嘅X-Type，但要擁有一架積架X-Type，對華哥嚟講應該冇咩困難，點解唔去擁有呢架DreamCar呢？「我揸車只係用嚟代步，實用慳油最緊要，唔鍾意買貴車，所以就算鍾意我都覺得冇必要去擁有。」的確，華哥擁有過嘅辣車Evolution，都唔係自己揀嚟買，只係某年無綫台慶嘅抽獎獎品。

跑車配套

■轉數表置於中間，速度表顯示去到260km/h，完全係跑車格局。

Momo軚環
■黑皮撞紅線嘅Momo真皮軚環手感一流，中間STi字樣更有令人熱血沸騰嘅感覺。

6前速手波
■一台6前速波箱緊密，華哥一見到已經問：「手波喎？咁好玩呀？」

■黑銀色嘅中控台鋪排簡潔，冷氣旋鈕就手方便。

■前座一雙跑車桶椅唔只承托力佳，藍黑撞色更加非常搶眼。

■以一架辣跑嚟講，後座空間可謂極度寬敞，中間重設有手枕，令乘客坐得更加舒服。