幾位讀者來電郵，向讀者交代一下：
（一）公益金社區關係助理經理唐行成來函話：「三月七日以《今時今日之服務態度》為題文章中，提及鄭姓讀者在○三年九月親臨公益金捐款，受本會員工冷淡對待，本會非常關注該事件。翻查記錄……本會已與涉及事件的員工了解情況及提出改善意見，同時敦促辦事處全體四十位員工加強與捐款者及公眾人士的溝通……誠望幫助我們與鄭先生盡快取得聯繫……」
公益金啲記錄都幾詳盡，一年半前嘅捐款記錄都可以翻查到，佩服佩服。讀者鄭先生如果想跟進，請打電話25996103與唐行成先生聯絡。
（二）讀者Law想知道中環及灣仔有地點「叮一叮」攞地鐵優惠。據所知，「叮票」地點分別在中環荷李活道行人電梯?天橋附近，及灣仔北萬麗海景酒店外。不過左丁山未去叮過，唔敢太肯定，或者你可以打電話去地鐵問清楚。
（三）李小姐問攞八折的士電話，恕不介紹。
（四）余太話二月二十一日本欄提及鄭大班，佢非常同意，佢與一班「大班擁躉」都好希望大班復出，每天祈禱希望大班與林旭華再開咪喎。自從冇咗《風波裡的茶杯》，余太及家人都轉聽港台，對時事不再太關心咯喎。
（五）讀者李是中五學生，對化學科冇興趣，想讀經濟學。中五生已經諗住投身金融界?商界，未必錯，但金融界?商界請人唔會限於請商學院學生，讀理科嘅都得。地鐵行政總裁周松崗在培正中學畢業，喺威斯康辛大學主修化學工程，返咗香港打工先至入中文大學讀三年制（part-time）MBA，讀者李可以參考。