嘉華建材（027）注入大股東賭牌一事仍然未見眉目，嘉建連同阿媽嘉華國際（173）繼續停牌。不過，其他澳門概念股稍後將有連串動作，濠賭股熱潮隨時再起。
經紀陳話，除咗龍頭股新濠（200）、信德（242）正在密鑼緊鼓，其他公司亦不敢怠慢，例如一直話會在澳門尋找機會興建酒店的富豪（078），終於與威尼斯人簽訂備忘錄，喺澳門興建酒店加娛樂場。由於呢隻股向來對任何消息都異常敏感，今次有大project，睇嚟又有一番熱鬧。
富豪上周五升1.56％，收0.65元，成交股數8217萬股，金額5318萬元。
經紀陳話，威尼斯人的澳門大型發展計劃，據聞將於本周正式落實及公布詳情。除咗富豪外，老虎仔的遠東發展（035）亦與威尼斯人關係密切，近排遠展股價一直處於強勢，唔知同呢單消息有冇關係呢？遠展上周五微跌唔夠1％，收3.75元，成交股數738萬股，金額2756萬元。
慕容小初