蔡依林（Jolin）噚日喺台灣出席新書《Jolin的二十四堂英文日記課》簽名會，現場書迷迫到水洩不通，工作人員變身人牆擋住歌迷，Jolin自己都嚇親，頻頻伸脷，最後賣出一千五百本書，認真厲害。
早幾日台灣樂隊B.A.D成員、蕭亞軒前男友Alex曾同記者話：「我最近正計劃找媒人牽線，放眼望去，我覺得Jolin是歌壇最正、最漂亮的女藝人，希望能有機會追求她。唉，只可惜以前她跟羅志祥、Ben去打球時，我都沒有去，白白喪失認識她的大好機會！」
噚日記者將Alex呢番說話轉告Jolin，佢忍唔住笑說：「哪個Alex啊？怎麼最近大家都愛幫我牽紅線？」當Jolin知道係蕭亞軒前男友時，佢話：「可是我跟B.A.D不大熟耶！當朋友當然是OK啦，可是他直接說不就好了，幹嘛找人幫他牽線啊？」
至於Jolin嘅緋聞男友羅志祥前晚喺廣州出席頒獎禮，佢否認同Jolin拍拖，重話：「我同Jolin認識了很久，大家是兄妹，不會有愛的感覺。」
黎姿呢排拍緊無綫新劇《胭脂水粉》，但天氣時凍時暖，搞到黎姿病咗，佢噚日開開吓工走去養和睇醫生，轉頭就歸隊繼續拍劇。黎姿同馮仁昭講，佢嘅戲份佔得好重，所以病都唔敢請假怕影響進度，佢話之前咳咗兩個月，𠵱家搞到氣管炎。
梁榮忠自從主持《殘酷一叮》後，人氣同工作量都大大提升，好似噚日銀河衛視嘅TVBQ頻道喺屯門搞嘅《SuperKids拔星初賽》，都專登搵忠仔出席，但忠仔今次只係做主持，而唔使叮人。馮仁昭見佢猛叫班參賽小朋友放鬆心情比賽，又真係幾有愛心！
吳浩康入行前原來係保鑣，佢噚日出席港台活動時話：「十七歲嘅時候我做過一個馬來西亞拿督嘅保鑣，但只係兼職形式。試過有次佢嚟香港開國際會議，好多記者衝上前，點知重有個黑人衝埋嚟，好彩佢冇攞刀槍，如果唔係就危險喇！」
董敏莉噚日出席九龍城廣場舉行嘅活動，佢話近日喺台灣拍新劇《海豚愛上貓》，演員包括近排喺台灣好紅嘅張韶涵。董敏莉喺劇中扮鄉下妹，佢話最希望可以唱埋主題曲，問佢擔唔擔心唔夠張韶涵爭，佢話唱唔到主題曲就唱插曲都冇所謂。
