阿董人去，特首7月補選，任期兩年，但唔排除有人搞司法覆核，正如去年年尾領匯事件，覆開有癮，拖落去，成為不明朗因素。投機市場好怕不明朗因素，跌多過升。另方面，大企業業績靚靚，新地（016）、太A（019）、中移動（941）派成績表後有反應，對個市又起支撐作用。此外，喺政治密雲下，可能有人特意想做吓昇平遊戲，出嚟護市亦話唔埋。所以，唔適宜太悲觀，亦唔適宜太樂觀。如果個市短期唔升又唔跌，觀望住先。想做嘢，則兩手準備。
恒指P輪：大市如果對換特首反應良好，有若干升幅，可以諗吓揸啲恒指P輪，博個市升唔得乜出樣然後回頭。
恒指P輪對象係3748與3582。3748喺7月尾夠鐘，輪價19.2仙，溢價2.9%，槓桿率10.6倍（有效7.8倍），引伸波幅18.1%。3582比較搏殺，5月尾夠鐘，輪價11.3仙，溢價2.8%，槓桿率19.8倍（有效13.4倍），引伸波幅15.5%。
恒指C輪：大市如果跌得多多哋，博有人護市，博個市會有技術反彈，可以趁低買啲恒指C輪。至於要恒指跌幾多先至值得博反彈，最好臨場執生，睇吓「2年、5年之爭」拗數熱度去到邊，同埋估計外圍會點。
低位買恒指C輪，對象係3775，7月尾到期，輪價16.6仙，溢價1.8%，槓桿率18.6倍（有效11.3倍），引伸波幅17.3%。搏殺啲，揀3577，5月尾到期，輪價8.5仙，溢價0.2%，槓桿率26.8倍（有效17.3倍），引伸波幅13.8%。未來個幾月內，好多大藍籌除息，不利短期恒指C輪。
章盛