鄭中基擔大旗嗰部《龍咁威2》噚日喺尖沙嘴開鏡，女主角由上集Stephy換咗Miki，李燦森同張達明嘅角色就冇變。啱啱有報道話鄭中基喺手臂老鼠仔位置紋咗個愛的紋身，紋咗緋聞女友蔡卓妍（阿Sa）個英文名上去，成班記者即刻叫佢騷隻老鼠仔出嚟睇吓，佢只係肯拉高衫袖，但就見唔到隻老鼠仔，又唔肯除衫。
鄭中基話：「唔好啦，咁肉酸，驗傷咩，差人搜身呀？搵日去浸溫泉先睇！」不過張達明就爆料話佢個紋身幾靚㖭！
阿Sa噚日凌晨喺台灣酒店暈倒，由助手陪住入醫院，鄭中基聽到即刻好緊張咁問：「唔係吖嘛？係咪攰得滯，之前睇報道只係話佢腸胃有事，又唔關攰事。」問佢會唔會打電話去慰問女友？佢話：「既然你咁講，咪打個電話，佢都係朋友。」
而阿Sa經理人霍汶希噚日就呢件事喺電話回應話：「Twins忙緊喺台灣出碟，阿Sa一緊張就會腸抽筋，佢噚日凌晨又發生呢個情況，痛到喺酒店暈咗，重撞親個頭，起咗層樓㖭，我打過電話問候，佢猛話個頭好痛，不過佢都睇咗醫生，只要放鬆啲就會好快好番。」
蔡一傑前晚應邀出席台灣一個活動，表演捽碟絕技。由於佢近七年嚟都冇到過台灣，今次有唔少fans到機場接機，令佢好感動。傑仔話十月完成香港嘅演唱會後，希望有機會到台灣演出。問到傑仔有關佢同已故師傅梅艷芳早年反面嘅傳聞，佢話唔想回應喎！
鄭裕玲（嘟嘟）下個月開始會幫無綫主持一個全新嘅法律遊戲節目《百法百眾》，馮仁昭聽聞無綫管理層好重視呢個節目，每集嘅法律個案，都落咗柯打搵有知名度嘅藝人演出，到時邊個唔肯畀面或者諸多推搪，無綫會記錄在案，咪話馮仁昭唔通知聲！
萬梓良聽晚將會去港台接受《你真超人》節目訪問，闊別多年嘅萬梓良難得返港，主持之一嘅李力持坦言唔會放過同老友敍舊嘅機會，希望可以同萬梓良暢談早年拍攝無綫劇集嘅趣事，大爆鮮為人知嘅秘密。
陳自瑤（YoYo）同小妹妹組合Cream噚日喺中環出席「中區少訊先鋒行」活動，YoYo話自己一直好支持反吸煙、反吸毒嘅活動，對於前排有好多藝人都牽涉藏毒事件，YoYo覺得吸毒絕對唔係紓緩壓力嘅方法，反而會更加易做錯事，而Cream就話自小父母已經向佢哋灌輸咗唔可以吸毒嘅訊息。
荷李活名導史提芬史匹堡（StevenSpielberg）監製嘅電影《藝伎回憶錄》最近喺日本播出一段預告片，結果俾人喺網上狂轟，指史匹堡搵三個非日籍演員扮藝伎唔適當。史匹堡還擊話：「我唔係拍反映藝伎生活嘅紀錄片，邊個適合角色，我就揀邊個，好演員係冇國籍之分。」
前晚銅鑼灣真係星光熠熠，因為王菲嘅出現，令到一間卡拉OK門前聚集咗成幾十個記者，場面非常墟冚，搞到有啲唔關事嘅藝人羅嘉良（圖）同老婆、杜汶澤同未婚妻田蕊妮、女子組合at17等諗住去唱K，見到咁多記者喺度，都嚇咗一大跳，重反問記者發生乜事㖭！
