荷李活男星佐治古尼（GeorgeClooney）早排喺意大利米蘭市以北嘅小鎮科莫湖（LakeComo）購入一座湖邊豪宅，最近重打算向政府買埋附近一個海灘，當地居民群起抗議，重大肆搗亂佢間屋㖭！
科莫湖係著名旅遊勝地，設計師DonatellaVersace同埋女星嘉芙蓮薛達鍾絲（CatherineZeta-Jones）都喺當地有物業，早幾年由鄭秀文同任賢齊合演嘅港產片《嫁個有錢人》亦都去過當地取景。
佐治古尼亦都俾旺中帶靜嘅科莫湖所吸引，所以早前豪擲九千八百萬港紙買入一座樓高三層嘅豪宅，當係佢第二個家。
佐治最近打算向當地政府申請購入佢屋企附近一個公眾海灘，即時引嚟當地居民嘅強烈不滿，因為個海灘係唔少當地人嘅避暑勝地，日前有大批市民攞齊架生到佐治間屋大肆破壞，大窗玻璃被石頭掟爛之餘，屋外又被噴上抗議標語同大畫Grafitti，認真慘情。
據講呢班抗議者中不乏知名人士，包括當地議員同牧師，其中國會議員話：「我哋唔想有人將公眾地方私有化。」而牧師就話：「佢係有錢人，政府對佢特別厚待，喺道義上絕對唔啱！」有人重話若果佐治一意孤行，後果就要自負喎！