古巨基前晚個唱邀請了譚詠麟和Cookies成員Kary任表演嘉賓。由於個唱反應佳，基仔更把昨晚整個演唱會的一百萬收益，捐給健康快車的眼科火車醫院作慈善用途。基仔經理人更表示正計劃添食。
古巨基首個紅館個唱反應熱烈，基仔特別將昨晚個唱的一百萬港元收入，撥捐「健康快車」的眼科火車醫院，幫助內地的失明人士重見光明。基仔昨日在演唱會舉行前，舉行了一個頒贈支票儀式，「健康快車」理事長陳振彬和創會主席方黃吉雯負責接收。
在一百萬的善款中，部份是基仔的個人歌酬，他說：「我之前都去過內地偏遠地方做探訪，覺得失明人嘅痛苦真係好難形容，今次我覺得好有意義，演唱會反應好，又可以做善事幫人，真係值得。」對於有報道指基仔正計劃籌備Part3演唱會，他說：「等公司安排啦，都唔知有冇檔期。其實我做第一同第二部分都用咗幾個月時間，其實都要放番啲心機喺嚟緊嘅新唱片度。」基仔的經理人黃柏高亦承認計劃添食，他說：「係有咁嘅構思，但要睇基仔嘅時間同埋紅館檔期，𠵱家未可以作準。」
另外，前晚古巨基的演唱會邀請了Cookies成員Kary上台獻唱，只見穿上透視裝的Kary表現怕醜，基仔走到觀眾席邀她上台合唱PingPung歌曲《愛是最大權利》，不過基仔拖着Kary起身時，基仔說：「吓？張櫈反起咗條裙？不如你再坐過吖！」基仔又拖着Kary安慰她說：「唔使震喎！」二人合唱完畢後更來個擁抱。
譚詠麟（阿倫）則擔任壓軸表演嘉賓，他甫上台基仔即向他敬禮，二人合唱《傲骨》後，阿倫搞笑地扮基仔早前在頒獎禮得獎時哭着的一番說話，更說：「我舊年多口講有四大天王，有啲人有微言，今晚你哋覺得佢（基仔）似唔似天王呀？其實喺娛樂圈唔係一朝一夕嘅事，有好成績亦都要有進步，你有冇進步呀？不過你跳舞好過溫拿啲啲。」
阿倫再問基仔：「我上得嚟實問你啲嚴峻問題，你估我玩呀？呢排有冇人問你，你同安仔（許志安）點比？」此時基仔誠懇地回答歌迷要尊重所有歌手，阿倫聞言即說：「幾好吖！modelanswer幾好，但我會答每個歌手喺每個階段都為前途而策劃，今日安仔為佢嚟緊嘅五年舖路，你𠵱家為你將來打基礎，所以啲嘢係唔一樣。」
採訪：何永寧、王連連
攝影：陳偉權
