新世界發展（017）嚟緊星期二公布05年度（6月止）中期業績，炒佢否極泰來，紮定馬，等撈底。
新世界上年度中期，未完全反映投資物業及酒店業因自由行旺場，租金收益上漲利好因素，但估計最新中期，會受惠呢個因素，令業績悅目。況且，上年度中期，新世界純利不過2.3億元，即將公布中期，要超越呢個數額，唔難。
踏入05年度下半年（1月至6月），新世界售樓進度異常理想，單係今年頭兩個月，已套現40億元，幾乎睇齊04年度42億元，貨尾單位重創97年來新低，售樓好成績，加埋集團出售香港貨櫃碼頭權益，有近10億元溢利，趕及05年度入帳，全年純利更加靚仔，估計上越20億元，冇難度。
再講，同級數股份中，新世界資產折讓最大（51%），但市值都講緊265億元，兼且超越部份恒指成份股，所以，新世界最新中期一有扭轉局面，向上大有空間，重納為成份股，依然在望。呢勻受大市震盪，再質落7.25元，好兜底。
麗展（488）係麗新系中，行得最慢嘅一隻，但冷敲無妨，又講兩點。第一，麗展呢期成功債務重組，由負資產變成正數企業，每股資產值雖然奀少少，但講緊0.18元，暫時未見有炒過龍。第二，喺重組債務中，麗展要向同系豐德麗（571）配發52億股新股，家陣麗展及豐德麗形成互控形式，你好我好，斷估唔會向下炒。何況，麗展及豐德麗，係家陣麗新系總舵主岳少一手打理開，點都會有啲情意結。市況講唔埋，暫定冷敲價0.12元。
錢雋