董先生正式公開宣布辭職，了結了一場長達十天的拖拖拉拉，教人鬆了一口氣。董生辭職，要配合七月十日嘅特首選舉時間，點都要在三月十三日之前宣布嘅。事前有謠言講董生未寫辭職信、未遞辭職信，於是有人以為佢會玩拉布戰術，拖得就拖。
喺董生宣布之日（三月十日），左丁山碰到議員Ｃ，議員Ｃ話：「我聽見董先生辭職嘅傳言，已經有好幾次，二月尾又聽到，以為係狼來了，唔敢信，直至不常發言嘅全國政協常委黃光漢對記者講董生可能做政協副主席，我先至敢去查證。香港人總以為當事人有自主權，可以決定幾時遞信，其實唔明白內地處事手法。譬如我哋上北京申請某某牌照，用口頭表達申請意願之後，就可以返嚟。得到有關當局話畀你聽：你可以申請嘞，我哋先至去遞申請書，跟住就再等一輪，牌照至會到手。如果貿貿然依照文件手續，遞上申請書，包保你全無希望，申請書如泥牛入海。
即係話，上頭叫你辭職，叫你遞信，你就遞信，遞信日期由大老闆決定；如果你私自遞咗信上去，小則捱批，大則受罰。用香港人嘅辦事方法嚟諗內地方式，一定撞板。」
所以話呢，香港喺九七年七月一日回歸，只係形式上回歸，香港政治文化未曾回歸，董橋寫《香港真的回歸了》，極有意思，值得洪清田為呢條題目再寫一百萬字，講劣幣如何驅逐良幣。由謠傳特首辭職、拖拉、呈交辭職信、中央拍板新的，不是新的一屆、特首嘅任期係二年，不是五年，都在在表現內地政治文化takeover香港。大家以後醒定啲嘞，曾特首個人或想幹一番大事，但佢點都冇法子抗拒中共政治文化嘅！