【本報訊】身為家中長子的曾蔭權，在親友眼中是非常尊重長輩的孝順仔，父親在生時會下跪敬茶，他現時仍不時與妻子返澳門探望年近百歲的外母，並趁機在澳門街頭巷尾品嘗美食，表現親民。
鮑笑薇的兄長鮑馬壯對妹夫印象極好，「蔭權好有禮貌，好有家教，兩夫婦經常返嚟澳門探我哋，食埋飯先返香港。」他表示早前曾蔭權夫婦曾返澳門外家拜年，但沒有透露接掌大權風聲。
在香港位高權重的曾蔭權，在澳門回復普通市民身份，當地不少食肆均有他的足迹。在內港的六記粥麵老闆李明佳稱曾氏夫婦毫無架子，「舖頭冇位坐，兩公婆就笑笑口企喺度等位，街邊有位照樣坐喺街邊。」
李明佳又說，曾氏夫婦對食物很講究，「有時食完麵，又會買啲碎雲吞皮返香港，佢哋話要嚟煲糖水，重好食過燕窩。」他說，有一次兩夫婦突然走上閣樓，原來是想偷師學製雲吞皮，「曾太睇我點用竹竿打麵同雲吞皮，睇咗成個鐘頭，曾太又叫我教佢包雲吞，佢學得好認真，每個步驟都寫低。」
曾蔭權亦曾光顧街邊小販，在內港賣乾炒牛河的「細龜」馮建華稱，前年七月曾蔭權首次幫襯，「佢走埋嚟點咗碟乾炒牛河，我愕然大嗌『你咪曾蔭權』，點知佢笑笑口話，『我知你叫細龜』。
嗰時香港啱啱有幾十萬人遊行，佢成日上電視，所以我印象好深。」去年底，曾蔭權赴澳出席回歸慶典，路經「細龜」檔口，曾還在車上向他揮手。