《火海豪情》係舊年睇過幾喜歡嘅西片，儘管好多人話佢唔及經典消防員的故事──《烈火雄心》咁「激」，不過故事及拍攝手法，嚟得真實深刻好多！今個星期新返3區港版，據聞來貨唔算太多，但銷情就非常凌厲，好多稍細間嘅碟舖都有缺貨甚至斷貨現象。
記者：朱崇德
DVDPRO
地址:旺角奶路臣街6E德發商場地庫B4舖
電話:23326326
消防員的故事，不論在技術上或裝備上，都使佢成為最難拍得好嘅電影！講當中經典首數當然係《烈火雄心》（BACKDRAFT）；不過唔經唔覺，原來佢已經係1991年嘅電影，拍得認真又令人印象深刻嘅「救火消防電影」，都真係空白咗好一段時間！
必睇Bonus：DD5.1實淨好聲
開機試碟，畫質做得唔錯，而且DOLBYDIGITAL5.1音效亦都幾實淨，令5場火警嘅臨場感十足。Bonus係5段的刪除片段，幕後花絮交足工課，最後重有電影主題曲《Shineyourlight》MV。不過個人最喜歡是「小人物大英雄」的現職消防員專訪，睇完你會更明白電影中的消防員故事有幾真實，而且刻劃的人物感情有幾真確。
樸實拍法難得情真
美國一次911襲擊，令人確切認識到消防員的犧牲精神，《火》亦是為此向所有消防員致敬所拍成的電影。電影基本是一個消防小梯隊的故事（Ladder49），雖然背後之包袱如此沉重，但驚喜者係佢並冇將消防員神化起來、冇大美國主義，而且亦冇運用一啲艱深難明的消防術語，令佢成為一部獵奇搜趣的電影，《火》是將日常生活中救火英雄的故事，逼真呈現在大家眼前。過命之交的兄弟連感情，苦中作樂式的幽默玩笑、救火救人同兄弟危難中的不離不棄，真係睇得人有血有淚！導演積羅素手段高者，是全省去「煽情」的手段，消防員本身已是現實中的英雄！生死一瞬間，但捨身救人的背後還有一個家，當真是情義兩難全。
5場火警串連故事
全套電影基本由5段火警事故串連而成，主要講述男主角祖昆馮力士（曾演出《驚兆》及《森魔》），由新仔加入Ladder49，認識亦師亦友的尊特拉華達後，變成一個捨身救人的好消防員。電影中火警場面超真實，據知是因為得到美國巴爾的摩消防局的協助，演員除在拍戲前要接受2星期真消防學校的訓練外，電影中的戲服（100磅重！）、消防車，都可是貨真價實的物品。不過最歎為觀止是5場火警，全部都係真實場景中「放火」，就連到場戒備的真消防員都話好有「真實感」呢！
