內地著名演員兼導演姜文，今年會開拍一套新戲《小女人》，主角人選已經定咗係梁朝偉、日本女星宮澤里惠同埋內地新人周韵，而姜文亦會喺片中擔任第二男主角，同梁朝偉一齊爭周韵，單睇演員卡士，已經好吸引。
周韵曾經拍過電影《天地英雄》，姜文睇中佢同梁朝偉做男女主角，係因為周韵曾經同偉仔合作拍過一個內地廣告，廣告入面佢哋係情侶，姜文覺得佢兩個好有默契，所以選角嘅時候一諗就諗到佢哋。
姜文已經發出邀請函搵宮澤里惠做呢套戲嘅第二女主角，雖然姜文嘅公司重未同記者正式確認佢參演嘅消息，但係宮澤里惠嘅經理人公司，已經喺日本向傳媒透露，話里惠今年會去廣西拍一套中國愛情電影，相信呢套戲就係姜文嘅《小女人》。
伊能靜噚日喺台灣出席牙膏宣傳活動，佢話以前鍾意喺支牙膏中間唧牙膏，但老公庾澄慶就堅持喺牙膏尾唧，有時重用鐵棍仔幫手逼埋剩低少少嘅牙膏，認真慳家。伊能靜話兩公婆有時會為呢啲芝麻綠豆嘅事嗌交，佢話：「我還會氣到把牙膏、牙刷都丟進垃圾桶。」伊能靜重會賭氣咁講：「我不刷牙可以了吧！」
陳慧珊冇喺香港一段時間，原來最近佢忙於開拓內地市場，經常中港兩邊走，噚日佢接受電台訪問時，話點忙都要抽空探屋企人，佢話：「之前我就抽咗兩個星期返美國探屋企人，諗住畀個驚喜佢哋，點知屋企人搬新屋，我搵咗成個鐘先返到屋企。」
有報道話鄭中基為表示對女友蔡卓妍嘅愛意，將女方嘅英文名紋喺手臂上。吳浩康噚日喺商台接受訪問時話：「我成日都覺得紋身就好似着咗一件除唔到嘅衫咁，同埋一個人身上又有幾多皮膚可以紋呢？」問佢如果第時女友要求佢紋咁點算，吳浩康話：「如果佢知道我唔鍾意紋身都要迫我咁做嘅話，即係唔諒解我啦，咁就唔好一齊。」
鍾嘉欣同黎諾懿今年成為咗無綫力捧新人，佢兩個都有份參演新劇《隨時候命》，噚日佢哋一齊接受新城訪問，鍾嘉欣就話第一次同鄭伊健拍劇，印象難忘，重大讚伊健搞笑，佢話：「伊健成個大細路咁，淨係拍手掌，都可以拍到一首歌出嚟！」
