高官約往港麗酒店Nicholini's吃午飯，欣然赴約。大概因為食客多，啲枱擺得稍為密一啲，昔日金融界紅人Ｔ先生就坐響我後面。稍後佢嘅客人嚟到，原來係紅籌Ｌ，Ｔ先生與紅籌Ｌ係昔日好拍檔，一齊食飯並唔稀奇，最弊係坐得太密，佢兩人嘅談話走入我嘅耳仔，紅籌Ｌ乃絕頂醒目之人，講完高爾夫球，立即要求轉枱，彼此方便。
隔咗五分鐘，左丁山後面張枱有客到，乃政經界名人Ｃ博士是也。Ｃ博士好嘢啫，講話陰聲細氣，左丁山一句都聽唔到。高官係呢間著名意大利餐廳常客，推薦左丁山食沙律自助頭盤。嘩，真係好料，件件靚嘢，淨係食頭盤已經可以好飽，呢個行政午餐只收兩百零蚊，直情抵到爛，唔怪得咁好生意。如果叫alacarte，貴好多，要開公數至得。
兩點過後，高官趕住去落區體察民情，立即埋單，鬆人之時，電訊Ｒ與我們揮手，先知道佢坐在另一邊廂。電訊Ｒ指電盈減價冇去到盡，打廣告戰句句穿心，夠晒勇猛。積蘇碰到咁嘅對手，如武松大戰魯智深，有好戲睇。
出到外面，一片煙霧迷濛，好濃嘅雪茄味撲鼻而來，左丁山冇法子唔咳幾聲，因為素來對煙味敏感也。原來餐廳外擺咗一張長枱，有十個八個食客，人人咬緊雪茄，其中有老友記律師Ｆ在，律師Ｆ話佢哋太嘈，不宜坐在餐廳裏面喎。高官就話呢班老友係一個「雪茄會」成員，每個月在此有一次午餐聚會。現時吸煙人士如難民，無地收容，能在此食靚意大利菜、擔番口大雪茄，已是大享受。將來餐廳實行全面禁煙後，「雪茄會」唔知會搬去邊度活動呢？