早前，筆者曾遠赴西班牙Valencia實地測試過寶馬新3系(廠方編號E90)，想不到本地代理商經已正式引入香港，並決定於今、明兩日於灣仔會議展覽中心舉行大型車展。打頭陣到港會是新車系較高級別的325iA，以及頂級型號330iA。全面革新下的新車款，無論外形或座艙鋪排皆予人有一新耳目之感，加上出眾的性能同操控演繹，相信勢必令車迷心動。
記者：陳偉林
攝影：陳偉強(部份圖片由寶馬車廠提供)
Model：Christy（Trinity）
鎂合金引擎發揮至極
率先到港的新３系－－330iA及325iA外形上完全一樣，只係330iA用上3.0公升引擎，而325iA則係2.5公升引擎。全新以鎂合金屬打造的3.0公升直6DOHC引擎，不單止令重量變得輕巧(只得161kg)，加上全新Valvetronic無蝴蝶瓣進氣設計，以及Double-VANOS構造，令新引擎無論低、中及高轉，同樣表現敏捷又見輸出平均。再者，新車系追加備有6前速Steptronic半自動波箱，緊密的波檔編排轉檔感覺流暢自如，令引擎得以發揮淋漓盡致外，新車另備有主動式安全系統，包括DSC(DynamicStabilityControl)、DBC(DynamicBrakeControl)、CBC(CorneringBrakeControl)，就算以高速掟彎仍見步履穩健。
座艙鋪排媲美高檔轎車
講到全新鋪排的3系車廂設計，最突出莫過兩排座椅組合，剪裁既貼身又富承托力，而前後排重各備有中央手枕及獨立頭枕配搭，前排亦有全方位電控功能，置身其中可謂愜意又舒服。再者，全車備有6個安全氣袋連充氣簾幕外，豪華裝備重包括有原廠高級6碟CD音響，以及前後獨立送風的左右獨立恒溫冷氣，豪邁舒適程度更不遜於同廠5系。
造型流露出轎跑車個性
承襲有同廠5系近似的FamilyLook，全新3系的車體輪廓，來得既突出又見流暢感，加上低斜的車頭設計，既營造出整體風阻系數只得Cd0.30之餘，還更富轎跑車動感。當中，又以革新的電鍍框邊鬼面罩，以及一對有神的Bi-Xenon頭燈至為吸引，若喜歡的話還可以加裝Adaptive功能大燈，以確保夜間行車的清晰度，而每一代3系獨到的門邊電鏡，相信亦勢必成為新3系的特徵之一。
寶馬330iA（E90）Specification
引擎：2996cc直6DOHC
馬力：258ps/6600rpm
扭力：30.6kgm/2500-4000rpm
傳動：6前速Steptronic半自動波，後輪驅動
懸掛：（前）麥花臣支柱
（後）五連桿
制動：（前）透氣碟
（後）透氣碟（ABS）
輪胎：225/45R17PirelliEufori@
尺碼：4520×1817×1421mm
軸距：2760mm
車重：1540kg
0-100公里：6.6秒
極速：250km/h（有限制）
平均耗油：9.0L/100km
車輛提供：寶馬汽車（27145271）
新車售價：$499,000(標準版)
同級對手比較
奧迪A42.0TS-line
點睇：剛面世新車款加入原廠S-line包圍，烘托出一身轎跑車色彩，用上一台2.0公升直4Turbo引擎(馬力200匹)，輸出及性能同樣表現出眾。
車價：$397,000
積架X-Type2.5
點睇：勝在造型年輕化又不失貴氣，採用上一台2.5公升V6引擎(馬力194匹)，輸出柔韌有力之餘，亦有不俗的乘坐感受。
車價：$398,000
平治C320
點睇：造型出眾品牌效應了得，用上一台3.2公升V6引擎(馬力218匹)，車廂配套吸引，性能演繹好突出。
車價：$475,000
富豪S40T5
點睇：代理早前加送全套SportPackage，令這輛轎跑車變得剛勁更具吸引力，以一台2.5公升直5Turbo引擎(馬力220匹)作主打表現突出。
車價：$266,000
