老董辭職塵埃落定，個市反應中性。下晝抽番上去，中移動（941）晏晝宣布盤數靚靚居功至大。恒指收報13890，升34點，中移動升0.60元帶動41點，重大過恒指點數升幅。滙控（005）尾市嘜128元，跌0.50元，拖低恒指18點。
中移動C輪：中移動去年盈利增18%，末期息0.46元（大增0.26元），芬佬對張成績表非常滿意，下晝開市隻股即刻搶韁。啲C輪自然跟埋上去，槓桿率大嗰批，升得更急，升幅超過15%嘅有12件。
中移動末期息相等於股價1.8%，炒短期C輪要計埋呢個因素，即係溢價實際要比較報價機嘅數據打大啲。中移動若見回吐，可吼C輪。3870係昨日冇得升嘅C輪之一，可以諗吓。隻輪明年3月到期，輪價27仙，溢價5.4%，槓桿率9.5倍（有效6.4倍），引伸波幅18.2%。隻輪波幅比較細，想搏殺啲，揀4571，6月尾到期，輪價14仙，溢價2.3%，槓桿率18.3倍（有效11.6倍），引伸波幅18.1%。
中電信C輪：中移動掂檔，博中電信（728）盤數亦見得人，亦博中移動帶動埋其他國內電訊股。網通（906）滯咗好耐，昨日亦受帶動向上移咗0.15元。中電信則仍跌5仙，收2.825元。
中電信C輪趁低買，只惜可供選擇者不多，一係數據唔靚，一係交投太靜。
若果唔嫌買賣難，可揀4638，隻輪5月初夠鐘，輪價33.5仙，負溢價0.4%，槓桿率8.4倍（有效6.9倍），引伸波幅35.5%。其次「孖四孖九」（4499）數據亦佳，但問題同樣係買賣困難。
章盛