701收料站:中科環保炒家埋位

701收料站:中科環保炒家埋位

近排除工業股外,似乎亦多咗二三線股炒作,好似中科環保(351)咁,自從中信老總位千金加入董事會,同收購埋環保業務中科通用能源後,股價亦見異動。
經紀陳話,據聞公司短期內會邀請芬佬同證券界人士上大陸,睇吓呢檔環保生意。
中科環保收購的中科通用能源,主要業務為在中國研發、生產及銷售鍋爐產品,以及提供運用廢物焚化發電的有關技術服務。自從收購咗呢檔生意後,公司股價由0.50元起步炒上,噚日又升7.79%,收0.83元,成交股數2305萬股,金額1859萬元。
至於呢檔生意有幾耍家,就要等班證券界人士睇完返嚟計埋數先知。不過,近排有班炒家剛好埋位炒作,所以場面先至咁熱鬧。
另外,早排收購咗檔石油碼頭同埋貯藏倉庫的漢思能源(554)噚日停牌,聽講公司透過1間歐資大行,以每股1元配股,涉及金額相當大,有成3.5億元咁多,當中有新股又有舊股,暫時未知反應如何。
慕容小初