香港代理界踩過濠江開分行，話咁快已經有錢賺，可見澳門樓市幾咁暢旺，連啲丟空多時嘅單位，都趁機放售。
中記手頭上就有個呢類盤，氹仔萬國華庭，八百六十呎，叫價九十九萬，每呎一千一百五十。中記話，賣點係全新未住過，重近市中心，叫價又合理。
蘭西聽美記講，萬國華庭原來已經有四年樓，共建兩座住宅，有會所，重採用智能式管理。聽落都幾接近港式住宅。
另外，當地都一樣有筍盤㗎，好似氹仔濠景花園，一個二千一百呎單位，叫價二百七十萬，呎價一千三百。中記話，單位有靚裝修，叫價低於市價一成半，重包埋車位㖭。
新晉炒家太子珠寶鄧鉅明家族，去年初以過億掃入尖沙嘴君臨天下七個單位，計劃打通自住，行徑出位，開始為人認識。跟住短炒尖沙嘴天文台圍全幢商住大廈，半年間勁賺三千幾萬，因而成名。
炒樓賺咗唔少嘅鄧氏食髓知味，去年底陸續購入多個豪宅物業，包括南區同跑馬地二手盤，成為代理界嘅頭號大客。
美記日前幫佢成功出貨，將揸咗短短三個零月嘅舂坎角璧如邨洋房轉售，賺近六百萬。
鄧氏去年十一月底，以三千二百萬，買入璧如邨C型屋，啱啱以三千八百萬售出。間屋三千三呎，呎價一萬一千五百幾，三個月升值近十八個巴仙，都算佢有眼光。
荃灣朗逸峯係○三年熱炒樓花盤，賺幅驚人，估唔到屋苑車位，升值一樣勁過人。
中記黃良昇話，截至三月八號第一季二手車位買賣，成交最多係紅磡海逸豪園，佔十七宗，觀塘麗港城與薄扶林貝沙灣，同以十六宗並列亞軍，跟住係有十四宗嘅朗逸峯。
不過，若以車位平均價格嚟睇，升幅最大係朗逸峯，每個三十九萬七，比舊年同期升近兩成八。海逸豪園車位平均每個近六十一萬，只升得九點三巴仙，排喺大角嘴港灣豪庭同荃灣麗城花園之後，得第四。
淺水灣南灣道九號共五十四伙，唯一賣散嘅洋房，近日轉手，代理估計由大業主恒隆高價回購。
呢間F座，二千七百呎，成交價三千五百萬，每呎近一萬三。原業主係恒隆友好，十幾年前買入，全屋苑得佢拆售，其餘全由恒隆持有收租。代理話，近排豪宅當旺，地皮緊張，恒隆買番，統一業權，一啲都唔奇。
豪宅咁渴市，日後恒隆想重建或翻新拆售點都得。好在恒隆當年賣畀友好，𠵱家貴市價少少買番，都唔算太麻煩，否則業主吊高嚟賣，就有排煩。
舖市投資熱，蔓延至非核心區，市傳華置大劉一擲四億五千五百萬，向劉皇發、戴權等二十個酒樓業主，買入元朗教育路嘉城酒樓四萬呎，包括地下至三樓商舖與樓上十三個住宅。
據悉，除咗惠康超市個舖連約，酒樓會喺六月成交前交吉。
華置話未悉有關交易，但經紀話，唔少投資者對呢個舖有興趣，其中大劉與大鴻輝出價最勇。
代理話，元朗舖位成交價，與銀行估價接近，未到好離譜地步，相信係吸引投資者興趣嘅原因。
電郵地址：[email protected]
