現年四十九歲嘅布斯韋利士（BruceWillis）自從同狄美摩亞（DemiMoore）離婚後，曾先後傳出同多位後生靚女拍拖，有消息就指布斯喺日前出席完新片《Hostage》嘅首映之後，竟然同現年十八歲嘅人氣女星蓮莎露夏恩（LindsayLohan）搭上，重話佢兩個喺酒店度過一夜良宵。
據英美嘅報章報道，由布斯主演嘅新片《Hostage》日前喺美國首映，因為布斯個大女露瑪（Rumer）都有份演出，所以喺首映當日，佢叫埋老死蓮莎露夏恩撐場，估唔到撮合咗年齡相差三十一年嘅布斯同蓮莎。
據講當晚首映禮完咗之後，布斯同蓮莎齊齊喺派對度撻着，蓮莎重公然向布斯展示佢右邊屁股、意大利文「LaBellaVista」（美好生命）嘅紋身，之後佢兩個急急腳返咗布斯間套房度過咗一晚。不過蓮莎個發言人接受《紐約郵報》訪問時，堅稱蓮莎對布斯冇feel，話佢哋兩個上房只係商討合作拍片嘅事。
其實布斯嘅前妻、即係四十二歲嘅狄美摩亞，喺兩年前搭上二十七歲嘅艾斯頓古查（AshtonKutcher）嗰陣，已經俾人話佢兩個搞姊弟戀，估唔到布斯今次重犀利過前妻，同細佢三十一年嘅蓮莎搞父女戀，難怪嚇親唔少人。