美股反彈，但港股在資金外流憂慮下，早段仍下試13800，幸而守得穩。中移動（941）公布去年勁賺420億元人民幣，增長18.1%，勝市場預期，而全年派息比率亦由20%升至32.7%，消息刺激股價午後急升2.61%至25.60元，帶動恒指倒升34點，收報13890。
有老行尊話，美國早前多次加息而港息不加，主要因為香港水浸，資金不斷流入。若情況逆轉，令香港乾塘，到時可能唔止要追加之前冇加的利率，可能重要額外再加都唔定。雖然董去曾來未必會對香港有實質影響，不過大鱷若趁曾未坐暖特首個位，就博政治大霧來襲，大市隨時會玩幾轉過山車。
美聯（1200）業績靚靚，可惜股價唔靚，主要是因為投資者嫌佢派息唔夠慷慨，開市冇耐就掟到落4.825元，收報4.975元，跌1.49%。美聯每股賺0.507元，全年派0.193元，派息比率只得38%，較03年略高1.5個百分點，加上冇紅股與紅輪送，又真係冇厘刺激可言。
華益（370）噚日下午突然成交大增，原來有一手5200萬股成交上板，每股0.197元，總值1024萬元，跟住股價略為抽高2.55%至0.201元收市。黑客話係主要股東減持，此股由7仙炒上嚟，至今升咗接近兩倍，都係時候食胡咯。AssetManagers早前以每股0.089元將批股債兌成7.01億新股，現在帳面賺唔少。不過，阿虎聽到消息，公司繼續在國內發展焦炭業務，稍後會陸續有動作。
阿虎