吳浩康去年被判藏毒罪成後，立志重新做人，為了遠離損友，遂更改手機號碼。正所謂「近朱者赤」，吳浩康日前表示緋聞女友鄭希怡（Yumiko）對他影響甚大，令他變得更有定力。
上周推出新碟的吳浩康，為應付連串宣傳和演出，日前開始踩滑板練氣。已十年未踩過滑板的他表現不俗，能凌空跳起越過障礙物，雖然其間曾失平衡跌低，但身手不錯的他隨即施展蜈蚣彈翻身，之後還擺出調皮甫士。
吳浩康去年被判藏毒罪成後，曾公開宣布要遠離毒害，他表示之後更改了手機號碼，刻意疏遠損友，但早前損友卻透過其他友人試圖找他，吳浩康說：「我知有啲人試過搵我嘅電話號碼，我係轉咗新號碼，因為冇必要嘅電話無謂聽。良禽擇木而棲，我都已經有新開始同新生活啦。」
談到緋聞女友鄭希怡，吳浩康即大讚對方思想正面，所謂「近朱者赤」，這亦間接令自己有所得益，他說：「佢係我嘅好朋友，我都好多謝佢。呢個女仔好好，又勤力，又刻苦耐勞，重好有目標，令自己不停進步，好難得㗎，所以佢嘅諗法會對朋友有影響，我都定咗好多㗎。」
至於發展機會，吳浩康顯得甚有保留，他說：「我入行前識佢啦，追佢係三年前，我得十八歲，都係打吓電話約吓佢食飯咁啦，可能當時唔係時候，總之我就食過檸檬，好酸㖭！佢由內到外都好吸引，你問有冇可能？實有㗎，都話唔埋，但係咪一定要發展先？最後唔好彩發展唔到咪好瘀！𠵱家應該放晒啲心機喺事業方面，去搵自己嘅目標，點都要做嘢先呀。」
採訪：朱倬誼 攝影：葉君海
