冥冥中有主宰，唔到你唔信邪。董特首辭職一拖再拖，昨日落實遞信。大家如果唔善忘，應該記得兩年前三月十日，就係威院八A病房出事之日，可惜封鎖病房已無法阻止沙士擴散。呢一日之後香港變成疫埠，間接促成大遊行，動搖董政權，成就煲呔曾。
一個日子可能係巧合，再講多個。前年，因田北俊倒戈辭職，行政會緊急開會決定押後二十三條立法，董建華七月七日在政府總部宣讀押後立法聲明。去年呢一日，咁啱董家班第三個問責局長楊永強落台，問責制散晒。而七月七日，正正係董建華的生日。
重有，去年領匯上市一波四折，政府出盡法寶拖咗幾次，最後迫於無奈在十二月十九號深夜宣布擱置。第二日，就係董特首去澳門見胡錦濤嘅大日子，你話幾邪。
傳真︰2623-9278
電郵︰[email protected]