港股有內憂（資金調走）、又有外患（油價新高拖累外圍股市大跌），噚日卒之出現調整，恒指曾經大跌200點，但低位有承接力，結果掃番上去，收13856，跌85點，已接近全日高位，成交保持205億元，沽壓不算太重。
噚日由低位抽得上去，指數跌幾十點，暫時仍可視為近日升市後的調整，受外圍影響，撞擊一下而已，整固後若能重上10日線（13933）同20日線（13974）之上，後市仍可看好。
呢輪好淡鬥法鬥得好激烈，恒指一逼近萬四關，淡友就使出「走資」一招，到目前為止，呢招嘅即時效應可說萬試萬靈。不過，特首辭職同接任人選安排，未來半年會鬧得熱烘烘，港股亦會進入政治市，有人造淡，亦唔排除有人要粉飾昇平，穩定人心。所以後市可好可淡，睇邊便手瓜硬。
國指收5057，跌28點，但石化股好強勢，上海石化（338）同吉林化工（368）都有5仙進帳，睇個勢，今勻宣布，盈利應該好勁，有貨在手者，等升多十零二十個巴仙收割可也。
上個月，兩度推介聯洲國際（048），當時股價在1.70元樓下，前日大升，噚日再上，收1.84元，升5仙，以突破上升三角形的量度升幅來衡量，呢個浪起碼都會見2字頭。聯洲剛宣布收購歐洲的品牌皮革業務同商標，有大行最新的報告，已即時調升其目標價，由2.50元上到3.20元，即係重有近75%的升幅。
信德集團（242）呢輪個勢好靚，由7.50元升到8.35元，噚日都只係跟市回落兩個位，市場重傳話佢會造「披成」，照計呢個消息係利淡，但睇買家個陣勢，仍然見到有大行在密密收集，可能要推高見9字頭，先會有所動作。若升破8.35元，最小量度升幅係9.20元。
信德除揸住澳門博彩實際權益9.18%外，呢輪開展參與賭業嘅新途徑，收益可以好勁，就以日後落成嘅南灣物業為例，單係賭場個瓣所收嘅租金分紅，保守估計1年都成4.6億元，已經多過家吓1年嘅盈利。
一波出報告，以20年經營權同折現現金流計，VIP房賭枱總收入（未扣博彩稅同營運成本）高達8.4億元，散客賭枱有6800萬元。澳博日後有賭枱近3000張，估值真係好「融」。
郭兆誠