老董正式辭職，政治因素減少1瓣，港股稍後可能會較為明朗，但亦不必急於入市，可候低位買C輪。至於買P輪，則除非個市或相關股票升得太勁，有平P輪買，否則都咪諗住。
太AC輪：太古盤數靚，太A（019）收64.25元，升1格。大市氣氛暫時麻麻，盤數靚未必股價會即刻大彈上去，股價上升都需要時間，可以吼住股價軟順之時，低位買太AC輪。
太AC輪13隻，通常冇乜成交，昨日有少少例外，3509以往有時零成交，前日1.7球，昨日大增至22球。買太AC輪，呢隻係正路之選，9月到期，輪價55仙，溢價5.1%，槓桿率11.7倍（有效6.8倍），引伸波幅26.3%，吼住喺50仙以下收集。呢隻輪平時冇乜交投好易明白，發行量200球，街貨原來只得0.4%（前日），經昨日大成交後，相信日後會轉活。3773數據更靚，可惜完全冇成交。
中企C輪：國企指數跌28點，收5057，仍處高位，博國指繼續回落而買中企指數P輪，唔易揀，唔係數據唔靚，就係交投靜。可以等待國指跌多啲之後，喺低位買C輪，對象係4545，下月尾夠鐘，輪價16.3仙，負溢價0.4%，槓桿率9.4倍（有效8.7倍），引伸波幅21.6%。
想搵長期啲嘅，揀3716，6月尾到期，輪價17.6仙，溢價1.9%，槓桿率14.4倍（有效9.5倍），引伸波幅21.8%。
聯想C輪：聯想（992）買IBM私人電腦檔嘢，通過審查，彈升8.6%，成為最大升幅恒指成份股。C輪紮紮跳，咪起痰，冇隻C輪追得過。
章盛