吳文忻近日與一香薰品牌簽約一年擔任代言人。日前文忻在影樓拍廣告，十四個小時內先後以十二個S美人造型出現，包括穿吊帶晚裝裙和僅以薄紗蔽體，務求營造香噴噴的女人味。
吳文忻最近成為歐洲ALQVIMIA香薰代言人，任期一年，酬勞有六位數字。日前寒流襲港，文忻卻偏偏只能穿着單薄衣物拍廣告，鏡頭後不禁凍到騰騰震，幸廣告商十分體貼，準備了暖袋及毛氈，給她在休息時作保暖之用。
吳文忻當日在葵涌一間影樓花了十四個小時拍攝廣告，先後以十二個不同造型示人，其中有兩個造型要她躺在地上，以兩幅薄紗蔽體，另外亦要穿上多套吊帶低胸晚裝，頗為性感。由於廣告商要凸顯用香薰後的香噴噴女人味感覺，故攝影師便要求吳文忻擺出多個S型的高難度甫士。
日前吳文忻在電話中說：「嗰日都擺咗好多S型甫士，有個姿勢要雙手抬起，搞到成個人要拗晒，拍完之後，我喺屋企攤咗兩日。我拍廣告嗰日天氣好凍，又落雨，啲衫又薄，所以唔係好敢食嘢，驚凸咗個胃腩出嚟，成日都係食咗幾條菜同生果咋。」
吳文忻表示一向有用香薰習慣，而她對香薰治療亦讚不絕口，故亦有意考取專業香薰師牌，吳文忻說：「香薰好有醫療性作用，可以醫鼻敏感、令人食慾好啲、減肥、豐胸都可以，所以我對呢樣嘢都好有興趣。𠵱家廣告商安排我上堂，學香薰嘅知識同用途，我都好想考番個牌。好似今次拍廣告，拍之前我至知原來做香薰按摩可以通淋巴，我用咗兩個禮拜時間做香薰按摩，做咗之後，全身嘅線條都靚咗好多。」
採訪：朱倬誼
