東方海外唔搶老董鏡 - 李八方

  東方海外唔搶老董鏡 - 李八方

正當全城追訪特首董建華幾時宣布辭職,財經界亦昅實董建華家族嘅上市公司「東方海外」,因為佢噚日公布舊年業績。八方關心嘅,梗係老董會唔會返番公司做榮譽主席之類啦,事關任何事情都會影響公司股價。
話說東方海外噚日四點半開業績記者會,老董就講明五點半先宣布辭職。東方海外嘅老臣子沈志澄,唔知係咪以前幫過老董選特首,具有一定政治智慧,巧妙安排西人財務阿頭快快趣讀完講稿,就開始問答環節,cut咗中國人財務阿頭中英對照讀多次嗰部份,重趕喺五點半前散水,任憑八方點問,佢哋都話老董單嘢未成事實,唔答揣測性問題。
至於董建華胞弟,即東方海外主席董建成,就照舊坐喺辦公室,埋頭苦幹,冇出嚟應酬記者。沈志澄笑言,董建成一向都唔參與業績記者會,佢哋會保持此「傳統」喎。

傳真︰2623-9278
電郵︰[email protected]

董建華宣布落台之日,父親董浩雲嘅銅像依然屹立在東方海外辦公室。