數碼影音:<br>SONY春季DC大晒冷T系新機薄過1cm

數碼影音:
SONY春季DC大晒冷T系新機薄過1cm

各大相機廠商自PMA相機展之後,就開始陸陸續續將展品「流落民間」。繼上星期CASIO及柯達之後,今個星期就輪到「DC班霸」SONY,除咗有事先張揚嘅H1、W5、S90及P200之外,原來重有全球首度曝光嘅神秘嘉賓T7!延續T系列一味要薄嘅優良傳統,T7嘅厚度認真駭人,全機最薄部份只有9.8mm,真係薄如無物!

記者:劉耀祥
攝影:陳偉強

本以為今次SONY新機晒冷會上,只係Show番之前PMA相機展上嘅新機,點知突然嚟個壓軸嘉賓T7,就連PMA上亦都未曾曝光,即時令到全場記者無不雀躍萬分!根據SONY傳統嘅型號編排,T系列就已經同薄字劃上等號,今次SONY更加出神入化,T7厚度只有14.7mm,最薄部份更加僅有9.8mm,比起一粒2A電池重要薄!當筆者拆開電池蓋時,就更加佩服SONY嘅造工,因為電池厚度就差唔多等於機身厚度,可想而知機內硬件真係「要幾逼整幾逼」!由於極薄嘅關係,按鈕亦都細細粒,尤其變焦掣更加的骰過人,不過手感都唔錯。雖然只有3倍光學變焦,但係如此薄機,都可以畀佢合格!

■屏幕同樣為2.5"大芒,不過機背按鍵配置就由右搬到左。

■變焦掣由機背走上機頂,Size亦都有咁細得咁細。

■機身具備主要按鈕,慳得就慳。

■全機最薄位只有9.8mm,比2A電池更要薄。

■電池同機身差唔多厚,睇得出機內硬件有幾逼。

功能掣右搬左

T7唔單止玩薄,機背重可以裝埋個2.5吋屏幕,的確唔到你唔服,不過為咗要遷就電池位,所以機背按鈕就全部飛晒去左邊,可以算係跟以往T系列機種最大不同之處,初用者就要花啲時間適應吓!而功能上除咗一貫嘅影相之外,拍片功能亦都唔弱,提供640×480解像度,若果諗住買部MPEG4拍片機仔玩吓嘅用家,相信都可以滿足到!不過有利亦有弊,由於T7太薄嘅關係,機身不設充電、AVOut及USB插頭,所以隨機會有外加插頭組件,過相前就要自行加上,稍為不便。

■要充電或過相,先要外加接駁插頭。

■機座並無任何插頭,最大作用係扮電子相架。

■記憶卡槽位於機底,好易走漏眼。

T7Profile

感光元件:510萬像素SuperHADCCD
顯示器:2.5吋
變焦:3倍光學+12倍數碼
記憶儲存:MSDuo/MSProDuo
電池:專用鋰電池
體積:91.7×60.2×9.8-14.7mm
重量:115g
$3,990(4月推出)

SONY重炮王H1

SONY久未有長炮新機出現,之前嘅F828都已經差唔多有成年時間,而今次更加開設全新產品線,名為H系列,而頭炮就有H1!對於一向鍾情於SONYDC外形嘅用家,H1嘅出現可能會令你失望,因為H1外形只可以普通形容,不過SONY今次將焦點放於其12倍光學變焦嘅大炮,以及其「超級防震系統」之上,成功令大眾轉移視線!作為SONY首部12倍光學變焦機種,H1鏡頭反應亦都唔錯,Zoom近Zoom遠速度敏捷,冇話窒吓窒吓。而「超級防震系統」就更加好玩,主要針對用家遠攝時容易出現手震嘅情況,唔會因為影得遠就即時變得朦郁鬆!

內置32MB記憶體

雖然H1走Prosumer機級數,不過就用上部份輕便式DC嘅優點!首先就係內置「救命記憶體」,除咗可以支援MS及MSPro記憶卡之外,更內置32MB記憶體,睇落好似好少,之但係當「身無張卡」嘅時候,32MB亦足以救你一命!其次就係用上2A電池,只要用兩粒2A電池就可以拍攝近290張相片,對於Prosumer機種嚟講,的確係相當可取!而H1嘅功能亦都走守半專業級路線,光圈先決、快門先決、全手動等有齊之外,微距亦可近至2cm,唯一可惜就係未有閃光燈熱靴,外加閃光燈時就較為麻煩!

■12倍光學變焦鏡頭反應唔錯,算係幾快。

■「超級防震系統」設有快速掣,有需要時先開啟。

■機頂轉盤甚具專業機質感,可惜不設閃光燈熱靴。

H1Profile

感光元件:530萬像素SuperHADCCD
顯示器:2.5吋
變焦:12倍光學+24倍數碼
記憶儲存:MS/MSPro
電池:2A電池×2
體積:108×81×82mm
重量:460g
$3,990(六月中推出)

■用上2.5吋大芒,觀感相當唔錯。