官恩娜早前拍攝無綫新劇《酒店風雲》期間暴肥十磅，由於她與同劇的吳卓羲傳緋聞，不禁令人懷疑她有愛情滋潤而心廣體胖。
官恩娜（Ella）與吳卓羲合作拍攝無綫新劇《酒店風雲》傳緋聞，有雜誌更拍下吳卓羲充當柴可夫送官恩娜返香閨。日前Ella接受本報訪問時，對吳卓羲大讚不已，看來她對緋聞男友印象非常好。
Ella說：「初頭我對佢唔係有好深認識，但拍完劇之後，覺得佢係幾正直嘅人，唔係想像中難相處，因為之前有啲報道話佢黑面。我開始拍劇時都擔心㗎，個個都唔熟，佢又唔係熱情、好多嘢講嗰種人，我拍劇冇乜經驗，鈍鈍哋，唔識企位，有時會遮住啲光，搞到成塊面黑晒，佢見到會主動叫我企過啲，又會同我傾吓偈。」
問Ella覺得吳卓羲為人如何？她即大讚對方說：「佢係好有活力嘅男仔，好有朝氣，陽光味好重。」Ella眼中的吳卓羲既具魅力，未知她有否觸電感？她即笑說：「係零！我拍嘢嘅時候成日會望住佢對眼，但冇乜感情喎。」
近期Ella圓潤不少，足足肥了十磅，問她是否獲愛情滋潤？她反應甚大說：「誤會呀！冇可能，我肥咗係因為拍劇成日喺飯堂食完晚飯又食消夜，個零食機又喺正附近，個零食機搞事啦！」
至於與吳卓羲有沒有發展可能，Ella想一想才說：「唔知聽日發生乜嘢事喎，呢一刻唔諗呢啲嘢，世界係圓嘅。我只係想𠵱家做好工作，因為入行第二年係最難行㗎。」
此外，官恩娜前晚在美孚接受RoadShow訪問，問她若房祖名邀請她參加成龍盃賽車，她說：「我唔得閒，唔好啦，都唔知架車係自動波定棍波，我只係得自動波車牌。」官恩娜又再三強調跟吳卓羲和房祖名的緋聞都不真確。
採訪：朱倬誼 攝影：葉君海
服裝：Pennyblack 場地：TheuarterdeckClub
