馮仁昭四圍超：
關錦鵬新戲超支停工賴Sammi

由關錦鵬執導、鄭秀文（Sammi）、梁家輝、吳彥祖同胡軍主演、喺上海拍攝嘅電影《長恨歌》，因為鄭秀文哮喘病發所以停工，但馮仁昭收到風，鄭秀文病只係停拍嘅其中一個原因，另一個原因係因為套戲嚴重超支，要同投資嘅老細講數，所以先至停拍。

陳自強出面
《長恨歌》係由JCGROUP同埋內地一間叫做海潤嘅公司合資拍嘅，海潤佔大股，本來預計投資額係二千二百萬，但𠵱家套戲只係拍咗三分之二，已經超支咗幾百萬，所以陳自強日前去咗上海，聽講係因為超支件事同海潤嗰邊傾吓，希望大家可以達成共識。
噚日記者就超支嘅傳聞致電關錦鵬，佢話：「你哋查清楚先啦，你哋問我我梗係話冇呢件事㗎！陳自強係有嚟過，不過佢走咗啦。套戲停工，係因為Sammi（鄭秀文）病咗，應該三、四日後可以復工。」

戴佩妮嫌祖名累事
房祖名嘅前女友戴佩妮以前試過俾男朋友一腳踏兩船嘅痛苦經驗，所以佢深深明白到做人忠誠嘅可貴，呢個亦成為咗戴佩妮𠵱家擇偶嘅首要條件，對於之前自己同房祖名傳緋聞，戴佩妮話：「不要再害我了，老和他扯在一起，別的男生都以為我名花有主了！」

成龍蠟像放國家博物館
中國國家博物館嘅中國蠟像館目前正展出一個由雕塑家艾德勝創作嘅成龍蠟像，成龍蠟像着住一件唐裝衫，加上成龍嘅招牌笑容，睇落去真係似模似樣。而蠟像說明就簡述咗成龍嘅祖籍、出生地同成名過程，包括佢一九七一年完成習武，同埋七八年主演功夫喜劇《醉拳》而成名，從此就開創咗詼諧嘅成龍式功夫電影風格。

元斌遭出版社索償
韓國靚仔元斌噚日被韓國一間出版社入稟法庭指控毀約，要求賠償二億韓圜（約一百五十萬港元）。控方指元斌喺○三年曾經同前事務所以及嗰間出版社簽約拍攝寫真集，不過其後元斌同前事務所解約，就簽咗另一間出版社，喺今年一月於日本推出寫真集，所以被人告。

蕭亞軒簽華納做四妹
蕭亞軒（Elva）擾攘咗一年嘅唱片合約，噚日終於已經有決定，佢決定簽約華納唱片，原定今日雙方會召開簽約記者會，但最後因為華納大老闆唔喺台灣，所以延遲簽約。咁蕭亞軒就有機會繼張惠妹、那英同孫燕姿之後，成為唱片公司嘅「四妹」喎。