董特首假如真的離職，失望嘅人好多，包括專欄作家與漫畫家在內。冇咗董生，邊度去搵咁多過癮題材呢？冇咗董生，漫畫嘅辛辣味道怕唔夠噃。漫畫Ｙ已經立即着手研究胡寒暄嘅相貌特徵，發覺都係江握手個相貌夠趣致啲，以後如何凸顯胡寒暄，尚須研究。
漫畫Ｙ對左丁山講：「睇落劉皇發去車公廟求籤，今年好鬼靈。現在諗番起，劉皇發求得之第十三籤中籤，共有四句，頭兩句話：『持齋受戒須精致，盛積爐煙薦聖賢。』邊類人會持齋受戒、盛積爐煙呢？梗係和尚、尼姑喇，屬於僧人一類。僧與曾同音，既然受戒，聽晒話，兼且多積爐煙，拜得佛多佛庇佑，推薦呢位聖賢就係姓曾嘅。」
「第三、第四句：『香火滿堂皆顯應，何勞經卷往西天。』即係話僧人已經受戒，誠求侍奉，香火滿堂咯，重使乜往西天取經吖，唐僧可以慳番啲腳骨力。即係話唔使勞動唐姓人士。明白未！」
解籤有好多種方法，漫畫Ｙ之言，唔可以話唔得，其他人士如有另外解籤方法，歡迎賜教。如果再解深一層，唐三藏毅力驚人，有孫悟空、豬八戒、沙僧護駕，久歷風險，卒達目的，所以現在唔可以話姓曾嘅一定坐梗個特首位，姓唐嘅一時之間被困，最後仍有機會。
董特首開咗先例，做完特首做全國政協副主席，成為國家領導人級數。本地左派幾唔順超嘅一樣嘢就係胡寒暄做完特首之後，會成為曾副主席，呢口氣好難吞得下，不過唔敢反對得太大聲喎，盛傳中央拍板畀曾生做二加五等於七年，如果反對得太激烈，以後可能冇運行。