「長毛」梁國雄同「阿牛」曾健成等一班四五行動成員，噚日趁董建華喺政府總部開記者會宣布辭職之際，走去政府總部門外示威贈興，要求盡快普選特首。政府如臨大敵，更因為長毛係立法會議員，可以進入政府總部，於是就搵外判私人護衞公司以人海戰術「禁錮」長毛，結果一圍就圍咗長毛兩個幾鐘，長毛冇咁好氣，一於坐喺地下唔肯走。
其間大班鄭經翰經過，問長毛乜嘢事俾人圍住，又問佢做乜坐低。長毛答話企得攰，所以要坐低。大班即時話，吓？長毛你唔企得，健康有問題，咁咪要學阿董咁辭職？
（圖）長毛做番街頭戰士，去踩阿董場。
傳真︰2623-9278
電郵︰[email protected]