手袋業張小姐：「董建華做唔到嘢又成日俾人鬧，佢落台係好事。𠵱家曾蔭權署任點都好啲，至少香港經濟已經好番。」
醫療產品公司嚴先生：「董建華冇做過好嘢，又唔理嘢，好應該辭職。我諗市民會接受曾蔭權多啲，佢形象都好啲。」
梁運輸業先生：「董建華做得幾好，好似自由行就搞旺香港。不過佢身心俱疲，辭職休息吓都好嘅。」
銷售業朱小姐：「董建華落台非常好，佢最衰就係八萬五政策，就算向市民道歉都冇用。對曾蔭權都冇期望，佢跟咗阿董嘴臉都差晒。」
文員鄭小姐：「董建華任內都算盡心盡力，但咁多人反佢，辭職都好應該。相信曾蔭權署任，對政府運作冇影響。」
中四學生梁先生：「董建華唔應該辭職，佢算做得幾努力，又累積咗管治香港嘅經驗。」
公司秘書助理黎小姐：「董建華辭職梗係好啦，之前咁多人上街都係想佢落台。佢任內樣樣都差，好似處理沙士都搞唔掂，𠵱家辭職更應該向市民道歉。」
保險業謝先生：「既然咁多人要董建華落台，佢辭職起碼大家再冇藉口埋怨，𠵱家大家應該齊心，搞好香港。」
文員陳先生：「董建華算做得唔差，𠵱家佢有咗治港經驗，唔應該落台。但相信曾蔭權署任都唔會影響政府運作。」
