特首董建華昨日舉行記者會宣布已向中央請辭，娛樂圈中人聞訊反應雖有輕有重，但一致認為特首辭職是件好事。杜汶澤叫特首「快啲走」，身在內地的黃秋生更詢問香港可有為此放煙花。而鄭裕玲和房祖名雖然認同董建華離職是好事，但力撐他已經為港盡力。 採訪：胡比、張止寒、比華利
杜汶澤：我睇完真係替內地同胞擔心，既然佢嘅身體狀況唔適合做特首，咁佢做政協副主席，對於十三億同胞嘅影響一定重大過香港七百萬人，我唔明國家點解會搵個病人做領導人。我睇完記者會覺得好失望，我本來以為佢辭職喺記者會可以講啲由衷嘅說話，但係佢講嘅我相信係大話，作為一個六十八歲嘅老人家，呢個階段仍然要講大話我覺得好悲哀，本來對佢都有啲依依不捨，但睇完就完全冇晒，佢都係快啲走啦，既然企幾個字都企唔到，快啲走啦！
啲智囊團勸董建華讀施政報告時唔好坐，如果啲智囊團係有智慧嘅，就唔係叫佢『唔好坐』，一早叫佢『唔好做』啦，佢做都影響香港形象啦！
鄭裕玲：董特首喺呢個時候辭職係好事，因為香港𠵱家漸入佳境，谷底反彈，呢個時候交棒都好適合，而且曾蔭權本身係公務員出身，對政府架構同運作好熟悉，我相信佢會係一個幾好嘅人選，我對佢會有期望。不過董建華辭職，大家又唔好燒晒炮仗咁，呢七年嚟大家係咪完全過得好辛苦？又唔係喎！佢都好努力推行教育，盡佢嘅能力去做，奈何佢係商人出身。至於舊年佢發表施政報告時，班智囊團叫佢唔好坐，我又覺得啱，試問除咗教宗之外，有邊個大人物出嚟講說話係坐喺度吖？
黃秋生：嘩！咁大家咪好叻，幾個禮拜之前已經知佢今日會辭職？咁佢梗係話身體問題辭職啦，我唔敢講話佢應唔應該走，但呢個係好多香港人嘅意願，佢走咗就真係要睇吓淨係佢衰吖，抑或係大家都有份咯，冇得賴吖嘛！我十日後返香港，到時就係一片新天地，有冇放煙花呀？
佢話身體差唔可以長時間站立，可能喺人大開會有得坐啦，咁對佢好啲，但佢去到邊中招中到邊，我都真係替內地驚，不過唔緊要，中央煞氣大，唔驚！香港做特首係眾矢之的，好陰功㗎，但好壞就同企冇關嘅，你估企門口嘅護衞咩？佢走咗就到嗰班智囊團岌岌可危。
汪明荃：佢講得出嚟，一定都同中央商量好先公布，佢長期工作，為港人服務，身體同面容都睇到佢有毛病。其實董特首已經係領導階層，以佢嘅家庭背景、人際關係同管治香港嘅經驗，佢絕對有能力勝任政協副主席嘅工作。
吳思遠：董建華任內為香港電影做咗好多嘢，希望繼任人一樣可以咁重視香港電影行業。
張同祖：佢係對電影業支持，但執行上就做得唔夠，希望繼任人可以喺知識版權法方面做到啲嘢。
房祖名：佢請辭幾好，佢都不求呢份工啦，佢為香港做咗好多嘢，特首個位好難做，一上台就俾人投訴，咁辛苦做嚟做乜呀？佢年紀又有番咁上下，而且香港愈嚟愈好，佢𠵱家辭職都留畀大家一個好印象，我覺得佢已經盡咗力，係一個心地善良嘅人，平時做嘢作風就沉默是金。
張堅庭：佢出嚟講嘢話喺一個鐘頭之前先請辭，但都傳咗好耐，真係千古奇案。其實呢個結果大家一早知，董生遲遲唔肯表態，就等於一套戲，有角色同人物，人人都拎住一頁劇本，但套戲就冇導演，最終都開拍唔到。而中央就一定要接納佢請辭。
不過曾蔭權近排啲身體語言好狂妄，不敢恭維，應該收斂一吓，否則會做壞名聲，真係要修飾吓身體語言，日後開會最好咪兩手fingfing，最好拎番個file。
