立法會噚日又流會,有陰謀論者繪影繪聲咁話,一定係老董辭職劇本所需,所以要立法會先收檔,老董先肯走出前台兼遞信。當然𠵱家大家講乜都得,反正特首辦都倒瀉籮蟹,一定冇人會出嚟否認。
究竟范太同老董有冇夾定,就只有佢兩個先知,不過,范太同八方講,佢先至係受害人,因為啲議員人數不足,搞到佢兩日都冇啖好食。事緣前晚范太食緊飯,長毛忽然要求點人數,於是范太急急走回議事堂;而噚日中午,主席以為可以食餐安樂茶飯,班大哥大姐又唔生性,唔知去晒邊,於是鐘聲一響,范太又要放落飯碗,結果重流埋會㖭。
范太唔開心,立會新丁郭家麒就應該更唔開心,因為佢噚日提出修訂湯家驊嘅動議,竟然得唔到一個民主派嘅支持,原因係話佢立場唔清晰喎,咁又話兄弟班?搵個人舉吓手都好吖。(圖)立法會流會,范太都話好唔開心。
傳真︰2623-9278
電郵︰[email protected]