噚日立法會就45條關注組大哥湯家驊嘅動議進行辯論，題目係反對增加功能組別，作為成員之一嘅梁家傑當然好想出席，以示支持，奈何有案在身，所以佢問法官攞咗人情，到時放佢走，又同助理講好，當林瑞麟一起身答辯，就call佢返去投票。
點知人算不如天算，當個call機響起之際，佢正在盤問緊人，當佢問完之後，就急急腳由法院跑出嚟，沿住電車路急步走去立法會，可惜都係遲來一步，去到門口剛好見到林局長走出嚟。
既然到咗，梁家傑都乖乖坐到流會先走。梁家傑話，阿董以身體唔好作為請辭理由好難令人信服，佢就覺得老董好精神，而整件事由頭到尾佢都感到好欷歔，亦好同情老董嘅境況，正係「官蓋滿京華，斯人獨憔悴」八方都戥佢慘。
梁大狀喺同情之餘，又慨歎特區制度之不健全，連補選特首年期都要拗。八方就話，慘情嘅應該係香港人至啱。
（圖）梁家傑由法院急急腳跑返立法會投票。
傳真︰2623-9278
電郵︰[email protected]