各位市民，各位朋友：
我喺一個鐘頭之前，向中央政府遞咗辭職信，請求辭去特區行政長官職務。
我請求辭職，係因為健康理由。因為長期以來，向住北面，我跪得太多、太耐，最近我同啲同事講，可唔可以扶我企番直，喺未來兩年幾，好似一個人咁企喺處施政。點知我啲同事話：董生，你跪咗咁耐，𠵱家先至想企番起身，太遲嘞，醫生話我同好多愛國人士一樣，患上咗下半身骨質疏鬆症，呢隻病，係長期腿骨同膝蓋骨摺埋扭曲所造成。
我覺得若果咁樣落去呢，我施政嘅判斷力會受到影響，從此我一企番直，就會好攰，好攰，所以聽咗醫生嘅意見之後，我決定都係辭去行政長官呢份工，上北京做政協副主席，因為呢個職位啱我啲。
將來我唔喺行政長官呢個位置上，我都希望全港市民，要警惕一啲港英餘孽干擾香港嘅穩定繁榮。我喺任內，得到好多愛國人士及政黨協助，雖然成功咁拆除咗好多港英留低嘅地雷，包括陳太、公務員制度、英語精英教學，不過，港英嘅地雷，係千千萬萬年都拆唔晒嘅。我希望香港人將來一齊努力，繼續掃地雷！
我走咗，唔緊要，不過呢兩日各位由傳媒中都知道：正如一啲港區人大代表及政協，呢兩日喺北京指出，前朝港英政府，好似鄧小平隔代指定胡總做接班人一樣，臨走時亦都隔代指定咗一個接班人，嚟到延長一個冇港英嘅港英統治。我呼籲市民，對於呢個問題，好似對付沙士一樣，千祈、千祈、千祈，唔好掉以輕心，要繼續同民建聯、工聯會、維園阿伯等等，緊密合作，必要時連同埋自由黨，要對港英餘孽，展開「契」而不捨嘅鬥爭，咁樣先至保持到香港穩定嘅。
至於我嘅辭職，冇錯，我喺一個鐘頭前確實向中央遞咗信，但因為特首辭職，係一件好大嘅事，我認為，對於呢件大事，我哋一定要慎重、小心、詳細咁一齊研究。因此我亦已經講埋畀中央知，我會同時成立一個「董建華辭職問題諮詢委員會」，用一年半嘅時間，嚟到收集民意，由我本人，出任呢個諮詢委員會嘅主席，親力親為，喺一年半之後，再由哈佛、牛津兩間大學嘅專家，依據呢啲民意，寫呢一個顧問報告書交畀我，到時我會再研究吓，先至決定落唔落實我向中央提出請辭嘅請求。
喺顧問報告書公布之前，我好高興咁話畀大家知，我會繼續履行行政長官嘅職務，繼續為市民服務嘅！
我今日就交代住咁多，多謝市民、多謝大家！
傳真︰2623-9278
電郵︰[email protected]