雖然大陸幾時先至公布發出3G牌照仍係未知之數，但大陸電訊股早排已經熱炒過一輪，近排連搞電訊配套服務的京信通信（2342）亦見鑊氣，據講公司近排頻頻與證券界人士會面，表明3G有利業務增長。
京信通信噚日突然抽上8.28％，收3.925元，成交股數1001萬股，金額3840萬元。
經紀黃話，踏入今年以來，陸續有證券行見過京信管理層，並且出過報告推介，噚日剛好有1間歐資行推介。
京信嘅主要生意，係為移動電訊網絡商提供無線覆蓋解決方案，例如研發、生產、銷售及推廣轉發器、天線及射頻無源電器等。據講籌建3G網絡，需要大量資本投入無線覆蓋解決方案，遠比家陣的GSM網絡為高，所以有利京信的業務。
京信今年初時，已經搞咗一項8億銀的融資，目的就係準備發展3G產品。
慕容小初