出身自沖繩嘅日本女星山田優近排有多個新廣告出街，阿優喺廣告入面一時展現出性感野性嘅一面，一時又充滿母愛，百變形象令佢極速上位，成為日本新一代打工仔殺手，迷倒唔少辦公室白領。
雖然阿優今年只得二十歲，但原來佢已經喺藝能界打滾咗好多年。阿優喺小學時已經入讀安室奈美惠同組合speed都讀過嘅沖繩跳舞學校，後來以組合B.B.WAVES以及y'zfactory名義推出過多張唱片，可惜一直未能走紅。
但擁有高䠷纖瘦身形嘅阿優冇幾耐就被日本雜誌《CanCam》發掘成為專屬模特兒，之後就人氣急升，成為日本OL嘅時裝人辦，而近日播出嘅多個廣告，令阿優成為打工仔殺手。
雖然夏天有排都未到，但阿優為日本化妝品牌佳麗寶所拍嘅防曬液新廣告已經出街，佢喺廣告入面着黑色比堅尼大騷雪白肌膚，又好鬼馬咁拉開比堅尼，硬sell曬極都冇泳衣印。至於蘋果乳酪廣告入面，阿優同小朋友大玩瑜伽，又餵佢哋食乳酪，認真母愛爆棚。而喺固力菓廣告中，佢就用cute到爆嘅表情食朱古力雪糕餅。另外，安室喺噚日捐出約七十五萬港元予南亞海嘯災民。