想擁有大圓床的豪氣，感受大圓床的浪漫，唔通一定趁旅行住靚靚酒店，又或者直踩入九龍塘時鐘酒店？啋！街外床都唔知幾多陌生人瞓過，點及自己家中整番張大圓床卿卿我我咁過癮！無奈圓床一向罕見，就算有，定價未至富豪亦幾近中產級數，今次宜家傢俬推出的2005年新款床褥及布藝系列，至正係5千蚊有找的7呎大圓床，你我升斗市民亦可以營造浪漫滿屋！要𠱁老婆仔就趕緊出手！
記者：張銘恩攝影：陳智良
模特兒：SilviaMa
床架床板功能多
除浪漫大圓床外，宜家亦同時推出一系列新床架和床板，嫌圓床唔夠實際的話，不妨睇吓可調校角度的活動床板、可直接拉起床板的床架，勝在功能多兼價錢比市面大部份同類床架相宜，瞓得你舒舒服服。
大圓床啱打枕頭交
圓床組合，圓形設計夠晒寬闊舒適，7呎咁闊同愛侶打枕頭交一流！內藏兩層彈簧及厚質泡膠，提供足夠承托力，連埋8cm全棉質床褥墊增加柔軟度，打埋觔斗都重得，連床架、床單、床褥墊及墊套$4,990（直徑7呎）。
長形睡床床櫳夠深
睡房細細放唔落咁大張圓床？唔怕！放唔落不如揀番傳統長形睡床，方方正正不但易於擺放，床尾重有拉繩方便拉起床板，拉起後側邊有角鐵支撐，唔使靠人手撐住咁辛苦。床板揭起後，床櫳空間夠大夠深，轉季放床舖被單最啱，單人$1,390（90×190cm），雙人$1,890（135×190cm）。
活動底板坐瞓自如
你都有鋪瞓床睇書癮？咁就要睇睇呢個新出的活動床板嘞！瞓覺，平放底板瞓得舒舒服服；夜讀，床頭部份可以逐格升高，中央的承托木條可調校成不同斜度，切合不同身形人士之需要，方便你睇書煲VCD咁，只備單人尺碼$490。（90×190cm）
春日回歸「輕」色上場
凍完一輪之後，終於都見番久違了的太陽，有番春天的感覺，係時候掃走一屋深沉氣色，換淺一點、粉一點的「輕」色上場！同場全新布藝系列已經推出，全部以淡淡的粉色為主調，大家不妨順道一看，揀番一兩件換換家裏的布置，迎接美好春日。
兩用棉緞床單
全棉質棉緞製造，優點是比一般床單織法更密，所以特別柔軟舒適，被套底面均有不同的彩色圖案，可隨意兩面使用，連單人被套及枕袋2個$365。（被套150×240cm，枕袋50×80cm）
歐陸味被袋套裝
嫌淺粉色太女性化，咁就要睇睇Man點的實色間條系列，充滿夏日歐陸色彩，全棉製造，亦備有紅白條紋以供選擇，連單人被套及枕袋2個$199。（被套150×240cm，枕袋50×80cm）
粉紅波浪毛毯
天氣漸暖，冚棉枱厚被焗到成身汗，但氣溫乍暖還寒，單單冚張薄被又頂唔順，咁不如買張又薄又輕身的毛毯代替，這張毛毯抓毛製，軟綿綿唔易變形，$199。（150x×240cm）
好攬咕𠱸玩手工
宜家的咕𠱸套通常玩Print，多款多色，今季就推出一系列大玩手工的咕𠱸套，有拼貼、刺繡、手縫，喜愛Detail及立體感的人記住昅實。
攞免費小冊子
唔知點揀床架、床褥同枕頭？入場咁記住攞本免費小冊子參考吓，內容除教你點樣布置一間舒適睡房，重教埋你如何選擇健康的床褥、枕頭等，真係唔買嘢都要攞本返屋企睇下。
查詢：宜家傢俬（31911188）
