噚日波迷茶餘飯後話題，離唔開車路士對巴塞隆拿場歐冠盃世紀之戰，搞到喺香港fans甚多嘅曼聯同AC米蘭對賽，都變得失色，曼聯出局變為碎料。又係嘅，當嗰邊車路士十幾分鐘就入三球，跟住到巴塞追番兩球時，AC對曼聯場波重係窿對窿，唔趕客轉台至奇。
不過我求大俠一樣有睇番AC對曼聯場波，查實水準一樣好高，而且有唔少點滴可以咀嚼，例如史高斯開角球時跣低開出界盡出洋相、老江湖卡富當基斯坦奴「插花」無到，兜口兜面波都搶埋、鬥牛㹴加度素難得美妙入楔射斜，重有睇見舒夫真高同個勁索老婆坐埋一齊睇波夠晒溫馨……，無睇到一樣係嘥料。話時話，曼聯出局後基本上淨番個足總盃可爭，即係最多同上季一樣，怕且唔搏命衞冕都唔得囉。
國米前鋒阿祖安奴上場入完波後，以為會轉運喇！點知又惹官非。事緣米蘭打吡賽後，阿祖開車離開之際，俾國米球迷鬧佢「走啦！去皇馬喇！」於是落車同人算帳，但俾差佬攔住；混亂間阿祖使出「黃金左腳」誤中差佬屁股。當地法院近日展開調查，重可能會起訴阿祖㖭！
之前喺伊拉克被綁架嘅意大利女記者絲格雷納獲釋後，講番其間嘅趣事。原來有個綁匪係羅馬「王子」托迪迷，其間重唔放過一場意甲聯電視直播；而絲格雷納就係迪比亞路迷，重俾綁匪笑話迪比亞路又屎波又唔夠托迪靚仔。一邊綁架人，一邊講波經，呢個綁匪都咪話唔騎呢！
曼城同前領隊萊利嘅追討賠償官司終獲高院裁定勝訴，萊利要將當年被炒嘅賠償費用當中四十多萬鎊歸還球會，理由是他○一年離職時，球會已篤定降班，他需要承擔球隊未能留在超聯所帶來的經濟損失責任。雖然四十多萬鎊唔算多，但對負債纍纍嘅曼城，真係追得幾多得幾多。
近排喺聯賽殺得性起嘅奇兵保頓，周六足總盃主場對阿仙奴，亦算係進軍歐洲賽一條捷徑；為咗呢場盃賽，保頓領隊艾拿迪斯真係要落足心機去做部署。可惜喺周二就傳出隊長中場奧高查因傷唔打得，少咗呢件主力，我求大俠都唔敢話太睇衰佢哋，但係留吓力打聯賽可能重化算。
逢星期日、四見報